Kalibogan sa bugas

Dunay dakong problema ang National Food Authority (NFA): Gisugo silang Presidente Rodrigo Duterte sa pagpamalit sa ani sa mga basakan sa mga mag-uuma inay nga mangompra og bugas humay gikan sa ubang kanasuran; apan nipili ang mga mag-uuma sa pagbaligya sa ilang ani ngadto sa mga negosyante.

Wa ba diay mobilib ang mga mag-uuma ni Duterte? Ang labing yanong katin-awan mao ang mas taas nga presyo sa mga negosyante. P17 matag kilo ang labing taas nga ikatanyag sa NFA. Apan ang labing uwahing palit sa mga negosyante niabot na og P18.60 matag kilo.

***

Angay untang malipay ang NFA. Ang mas taas nga presyo nagkahulogan og mas dakong kita sa mga maguuma. Maayong balita nga wa maggamit ang pundo sa NFA nga gitumong pagpanalipod sa mga mag-uuma kon daugdaugon sa mga negosyante pinaagi sa baratilyong palit.

Apan napakyas ang NFA sa lain niyang mandato. Ang pagtipig og sobrang pundo sa bugas humay alang sa dinaliang panginahanglan kon kalit nga mosulbong ang presyo o may katalagman: 15 ka adlaw nga reserba gikan sa Oktubre hangtod sa Hunyo ug 30 ka adlaw nga reserba sa tingnihit gikan sa Hulyo hangtod sa Septiyembre.

***

Giangkon ni NFA Administrator Jason Aquino, nga maoy gidapigan ni Duterte sa iyang pagtaktak sa sinaligan ni Cabinet Secretary Jun Evasco, nga nagkinahanglan sila og dugang 9.8 milyones ka sakong bugas humay aron makab-ot ang gitakdang strategic rice reserve.

Kay di man mobaligya nila ang mga mag-uuma, ang bugtong tinubdan sa dugang bugas humay sa NFA mao ang pagpangompra gikan sa ubang kanasuran.

***