Panghambog ug teknolohiya

Haskang ngilngiga sa panganti ni Presidente Rodrigo Duterte: Takos ang militar ug kapolisan pagsubay sa kalihokan sa mga sakop sa Abu Sayyaf pinaagi sa satellite; ug busa kon mosuway sila og pakatap sa ilang pagpanghasi gawas sa ilang tagoanan sa Mindanao, paulbuhon dayon sila sa kadagatan.

Kon saktong pangangkon ni Duterte, nganong gawasnon mang mga bandido nga nibiya sa Sulu, nilatas sa kadagatan sa Mindanao ug Kabisay-an ug nakasud sa Bohol? Di satellite kon dili ang mga bata sa Ylaya, Napo, Inabanga, maoy nakabantay sa gibuwad nga mga armas ug mga bala nga sama kadako sa mais.

Kon makahimo na ang bag-ong mga teknolohiya sa gubat nga nahuptan sa militar ug kapolisan sa pagsunod-sunod sa kalihokan sa Abu Sayyaf, nganong magpaabot pa man si Duterte nga mogawas sila sa Sulu? Nganong di man gamiton ang iyang gipasigarbo nga tagging system sa satellite pagtultol sa mga bandido sa kalasangan sa Sulu ug Basilan?

Nganong magpaabot pa man ang militar ug kapolisan nga makalihok ang mga bandido --nga makapanagit og lokal ug langyaw nga mga biktima ug makapangilkil og ransom gikan sa ilang mga paryente--nga mahimo ra man unta silang pulbuson samtang tua pa sa ilang mga tagoanan nga layo gikan sa inosenteng mga sibilyan?

Kadaghan na nasakpi si Duterte nga nagpalabi sa iyang

sulti. Nangangkon og mga butang nga di diay tinuod ug dihang nasakpan igo lang namasangil nga nagkomedya o nagbugalbugal ra siya o sa way pag-angkon sa sayop niusab dayon sa istorya.

May mga higayon nga bisan nabisto nang iyang pamakak padayon nga niinsistir si Duterte sa sayop niyang kasayuran. Wa pay ek ang militar ug kapolisan, wa modason ni mohimakak sa sulti sa presidente. Kinsa man sab tuod ang mo-risgo nga maoy sunod nga balikason ug pakauwawan sa publiko?

Bisan ang ganting P8 milyones ug awhag ni Duterte sa mga sibilyan pagpatay sa nagtagutagong mga bandido sa Bohol mahimong managlahi ang sangpotanan:

• Mas magkugi ug mangisog ang mga sibilyan nga nakatultol sa mga bandido pagpahibawo dayon sa militar ug kapolisan; o

• Maglumba ang mga way lingaw pag-armas sa ilang kaugalingon ug pagsudlay sa kalasangan ug posibleng panag-unay, pagkadagit ug pagsamot sa kaguliyang.