Pakauwaw nga Iningles
Nakatambong ka ba og programa sa eskuylahan nga ang tanang nidiskurso apil nang emcee naningkamot og Iningles? Klarong di sila larino, gawas nga nasipyat paglitok ang pipila ka pung may mga bahin pa g’yung di kaayo masabtan, may nisuway sab pagsag-ulo apan nakalimot ug naglibog unsaon pagsumpay o pagtiwas
Labaw’ng nag-Iningles ang pinasidunggang dinapit. Nanghugyaw kadiyot ang mga tawo dihang iyang gisagolan og Binisaya –aron lang pagpasiaw– apan nanampiling ug nanghuy-ab ra sab og balik dihang nipaturatoy sa mensaheng way paglaom nga masabtan kay gipaagi sa dila nga langyaw na nagkayamukat pa.
Nakatambong ka na ba og tigom sa mga konsehal sa mga dakbayan ug kalungsoran nga ang labing sabaan mao rang mga magbabalaod nga mas daghan og buwak-buwak nga Iningles kay sa mapuslanon nga mga ideya? Nga kasagaran sa mga nagduda sa ilang Iningles nipili sa pagpakahilom sa kahadlok nga masawayan ug mauwawan?
Nagtan-aw sa mga magbabalaod ang mga magbubuhis nga gidapit kay ilang mga interes ang nahilambigit sa ordinansahon nga gituki. Kabahin lang sa sesyon ang ilang nasabtan kay gawas nga nagkatuiris ang mga Iningles. Di sab silang kasal-ot kay nabalakang di paigo ang Iningles pagpadayag sa unsay naa sa ilang hunahuna ug kasingkasing.
Nakatambong ka na ba og husay sa hukmanan nga ang tanang nahilambigit –huwes, mga manlalaban ug mga saksi– naggapos sa way kinutoban nga tuyok-tuyok sa Iningles nga mga pangutana ug mga tubag ug mga lalis nga mas daghang sipyat kay sa tsamba?
Nakadungog ka na ba og saksi nga nagduko kay di kalahutay og Iningles ug busa gihubad sa mga manlalaban ang pangutana ngadto sa Binisaya ug gihubad na sang tubag sa saksi ngadto sa Iningles aron mahimong kabahin sa opisyal nga mga dokumento sa kaso?
***
Ang tanang nalista sa ibabaw kasinatian sab sa nasudnong presidente sa Lubas sa Dagang Bisaya (LUDABI) nga si Atty. Leo Zaragoza. Kinsa nipasabot nga kon wa pa lang magpaka aron ingnon ang mga nanambong sa programa sa eskuylahan, sesyon sa mga konsehal, ug husay sa korte mas magkasinabtanay unta kon nilitok pa sa ilang kaugalingong dila.
Nganong mauwaw man tang mag-Binisaya? Nganong naghupot man sa sayop nga ideya nga brayt tang paminawon kon mag-Iningles?