Kalaworan sa pangaliya

Dihang namalihug si Msgr. Ruben Labajo, Kura Paruko sa Cebu Metropolitan Cathedral, nga ipahibawo namo ang mga tugon alang sa mga deboto sa higanteng prosesyon pagtimaan sa ika-100 nga tuig nga sumad sa kataposang pagpakita sa Mahal nga Birhen sa tulo ka bata nga magbalantay sa mga karnero sa Cova da Iria sa Fatima, Portugal, nagsabot mi sa akong asawa nga manguyog.

Nanghangyo sab mi sa magpa-uban sa suod namong mga higala. Nga bisan daghan og kabilinggan nipadaplin sa uban nilang mga lakaw. Nagkauyon ming mag-abot og panihapon duol sa Kapitolyo.

***

Samtang nanghigop sa init nga sabaw'ng munggos sa kan-anan nga nagtanyag og pulos utanon sayo sa gabii niadtong Biyernes, nagsige mi og hangad sa langit pagpangita og timaan sa pasidaan sa PAGASA nga mahimong uwanon ang prosesyon.

Nakaginhawa mi og luag pagkakita nga hayag ang kawanangan, gani niamag ang puti nga mga panganod. Apan may pipila ka bahin nga nagdagtom sa dag-om. Nabantayan nako nga ang ubang nangaon, sama namo, nagbitbit og mga payong ug kapote pagtuman sa tugon sa mga tigpasiugda.

***

Pagsugod na namo og baktas paingon sa tapokanan sa tugkaran sa Kapitolyo, nabalaka ang akong asawa nga di siyang kaagwanta sa kabaga sa mga deboto, kaaso sa natanggong nga mga sakyanan ug labihang kaalimuot bisan sa hulga sa uwan.

Nihangyo siya nga mouna na lang og pauli ug nanugon nga i-apil sa among mga pangaliya. Uban ang nabatyagang kahaw-ang, gilamoy ko sa nagbawud-bawod nga mga deboto uban nilang Klasmit Yul Julia ug Atty. Ralph Sevilla.

***

Naghabu-habo pagtungod namo sa Abellana National School ug hingpit nga nibunok pag-abot namo sa Colon. Gawas sa pipila nga way pandong nga nagpasilong sa sidewalk, ang kinabag-an determinado nga nipadayon sa prosesyon hangtod sa Basilica Minore del Sto. Niño.

Nakasud nang ulohang bahin sa Pilgrim Center apan ang ikog mao pay pagbiya sa Kapitolyo. Gibanabana nga 20,000 ngadto sa 30,000 ang tanang nanguyog. Lisod balibaran ang tiunay nilang pangilaba alang sa kaayuhan sa mga sakit, kaangayan alang sa mga biktima sa inhustisya ug kagawasan sa katimawa alang nila ug sa ilang mga minahal sa kinabuhi nga nahibilin sa ilang mga pinuy-anan.