"Philppines" ug "Phillipines"
Sa way pag-apil sa bakak nga kasayurang gipakatap ni Presidente Rodrigo Duterte ug sa iyang mga tigpamaba ug mga dumadapig, nagkataas na ang listahan sa wa kinahanglana ug klaro nga wa tuyoa nga kasaypanan sa iyang pamunoan.
Ang pasiuna nga kasaypanan gibasol sa kabag-o sa mga tagduma sa mga buhatan sa nasudnong gobyerno, posible nga di pa lang pamilyar sa ilang gimbuhaton. Apan human sa kapin sa tuig nga pagduma sa Malakanyang, lisod na nga pasayluon ang pag-spelling nila sa ngan sa atong nasud nga "Philppines" sa tarpaulins nga nihangop sa mga delegado sa ASEAN Summit sa Metro Manila.
***
Duha ang kasagaran nga tinubdan sa ilang kasaypanan:
•Una, ug ang labing bantang, mao ang mga diskurso ni Presidente Duterte nga kay way script nisangpot sa pagkalipat nga ang "gubat sa Marawi" iyang giingon nga "gubat sa Malaysia" ug ang tsirman sa ABS-CBN nga si Gabby Lopez nahimo na nga "Gabby Concepcion;" ug
•Ikaduha, ug ang mas subsob, mao ang social media posts sa Philippine News Agency (PNA), Department of Foreign Affairs (DFA) ug ubang mga ahensiya nga klarong wa niagi og editors.
***
Natakdan sa kasaypanan si US President Donald Trump nga nia karon sa nasud aron pagtambong sa ASEAN Summit. Wa niya kopyaha ang sayop nga spelling sa Malakanyang nga "Philppines" kon dili naghimo og iyang kaugalingon nga sayop: "Phillipines."
Mas daghan ang kasaypanan ni Trump nga kasagaran nahimo sa iyang tweets sa alas-3 sa kadlawon: "Covfefe" (inay coverage); "lasting peach" (lasting peace); "Israeli's" (Israelis); "W.H. Council" (W.H. Counsel) nga human sa pila ka adlaw gihimo na sab niya nga "councel"; "Unpresidented" (Unprecedented); "Tapp my phones" (tap); "No challenge is to great" (too great); "Denmakr" (Denmark); ug "hear by" ug "hearby" (hereby).
***
Mamenosan ang sayop nga tweets ni Trump kon i-activate ang spell check ug autocorrect sa iyang iPhone. Apan bisan pa, tungod sa kaduka sa alas-3 sa kadlawon, mahimo nga makamugna og dugang kasaypanan.
MakasulbadsakasaypanansaPNA,DFAugubangahensiya ang takos nga editors. Sa pikas nga bahin, kay di man moangkon og sayop si Presidente Duterte, padayon lang niyang basulon ang mga sakop sa media.