Pagbalikos sa kalibotan

Wa mag-inusara ang Facebook sa pakutay og mga kable ilawom sa kadagatan aron pagpalapad sa paspas nga koneksiyon sa internet sa nagkalainlain nga bahin sa kalibotan. Siya hinuon ang labing una nga nakiglambigit sa gobyerno sa Pilipinas human sa nabulilyaso nga national broadband network (NBN) project sa ZTE Corporation sa China niadtong 2007.

Apan ang Facebook nakigtambayayong sab sa iyang karibal nga mga kompaniya, apil na ang Google ug Microsoft, aron mas paspas ug mas taas nga mga kable ang ilang maladlad ilawom sa kadagatan sa mas daghan nga kanasuran sa kalibotan.

***

Sa di pa hinuon mag-ambak-ambak sa pagsaulog ang kadagkoan sa Malakanyang, nga mora og ang Facebook mao ang manluluwas sa Pilipinas gikan sa nagkamang nga internet, angay sila nga pahinumdoman nga ang nag-una nga katuyoan sa Facebook, sama sa Google ug Microsoft, mao ang pagtagbaw sa ilang kaugalingon nga panginahanglan.

Naamgohan sa Facebook ug ubang higante nga mga kompaniya sa internet nga ang mga kable ilawom sa kadagatan makatabang nila sa tulin ug luwas nga pagda sa pribadong user data lagbas sa nagkatag nila nga data centers sa tibuok kalibotan.

***

Sa kinatibuk-an, duna na karoy 359 ka aktibo nga undersea cable systems nga naglibot sa kalibotan. Ang labing taas nga kutay nagsumpay sa Uropa ngadto sa Australia ug Asya nga may 39 ka landing points ug langyab nga 39,000 ka kilometro.

Tungod sa paspas nga pagburot sa data nga kinahanglan nila nga dad-on sa tanan nga suok sa planeta, nahukman sa Facebook, Google, Microsoft ug ubang higante nga mga kompaniya nga mas maayo nga sila ang manag-iya kay sa mamalit og mga kable sa ubang mga tinubdan.

***