Hulga sa kauhaw
Salamat sa kapating sa National Water Resources Board (NWRB), padayon nga nameligro ang suplay sa tubig sa Sugbo. Niinsistir ang NWRB nga sila ra ang makapatuman sa mga probisyon sa Water Code of the Philippines bisan wa silay igo nga kawani, kakugi ug kaisog.
Hagbay ra nga nag-awhag ang lokal nga mga opisyal sa Sugbo nga hatagan sila og deputation sa NWRB aron nga makatabang sa pagpanalipod ug pagpalambo sa nahulga na nga mga tinubdan sa tubig sa mga dakbayan ug kalungsoran sa Sugbo. Apan, nakatag-an ka, nagpalingug-lingog lang ang NWRB.
***
Bisan tua ra sa kaulohan ang buhatan sa NWRB, sayon ang pagbantay sa gidaghanon sa tubig nga nakonsumo sa mga Sugbuanon niadtong katuigan nga ang Metro Cebu Water District (MCWD) ra ang gitugotan sa pagsuplay og tubig sa kabalayan sa ilang franchise area.
Apan human gibungkag sa Korte Suprema ang monopoliya sa MCWD, nanguhong ang pribadong mga kompaniya sa tubig nga nag-iyahay pagsuyop og tubig gikan sa ilawom sa yuta ug pagpakatay og mga tubo ngadto sa kabalayan nga nahikawan sa suplay sa tubig sud sa daghan na uyamot nga katuigan.
***
Mag-agad ra ang NWRB sa mga taho sa MCWD ug pribadong water districts sa gidaghanon sa tubig nga ilang nasuyop ug naapud-apod matag adlaw. Apan kay tua ra man magtungkawo sa kaulohan way katakos ang NWRB pagsusi sa tinuod nga hulagway dinhi sa ato.
Makapakugang ang nahibaw-an sa mga inhinyero sa MCWD sa niaging tuig nga nagsugod na og kaparat ang tubig sa Mabolo, Cebu City ug sa Mandaue City, Lapu-Lapu City ug Liloan tungod sa naghinobrang suyop sa groundwater.
***
Ambot konsuylo ba, o dugang ebidensiya sa ka-inutil sa NWRB, di lang Sugbo maoy ilang gi-isnab. Hasta ang Davao City, ang pinangga nga pinuy-anan ni Presidente Rodrigo Duterte, nabawo sab sa ilang pagsuway pagpanalipod sa ilang mga tinubdan sa tubig.
Uban ang pagtuo nga sila ang labing nasuhito sa ilang suplay ug panginahanglan sa tubig, nag-umol ang taga Davao sa ilang kaugalingon nga water code ug nangayo sa deputation sa NWRB. Apan gikasab-an sila sa NWRB tungod sa pagpanghilabot. Ambot kanus-a malingian sa Malakanyang ang ilang katikig ug kakanahan.