Sulbad sa Mandaue

Ilusad sa Dakbayan sa Mandaue sa di madugay ang “Mandaue App” nga motanyag nimo og sayon nga paagi sa pagkuha og kasayuran gikan sa City Hall, o pagpangayo og tabang ug pagtaho og krimen o aksidente sa kapolisan, o pagsud og nagkalainlain nga transaksiyon.

Kabahin lang ni sa daghang kausaban nga gipa- hibawo ni Mandaue City Mayor Luigi Quisumbing sa iyang pagtambong sa Arangkada sa dyAB Abante Pa, Bisaya! gahapon sa buntag. Pagtugot sa Bangko Sentral ng Pilipinas na lang ang ilang gipaabot aron kasugdan ang binayranay sa mga buhis online.

* * *

Gibutyag sab ni Quisumbing nga ang ilang pagsagop sa bag-ong sistema sa paghikay sa mga dokumento sa mga negosyo sa Mandaue, nga niwagtang na sa naandan nga pagduma sa mga kawani sa dakong bahin sa proseso, sobra pa sa nakadoble sa ilang koleksiyon sa buhis karong tuiga kon itandi sa niaging tuig.

Tungod ini, kasugdan na nila sa pagpatuman ang komprehensibo nga drainage plan, nga gipanghinaot nga hingpit na g’yud nga makasulbad sa lapad ug karaan nang problema sa trapiko sa Mandaue, nga gahinan og dul-an sa usa ka bilyon ka pesos.

* * *

Nideklarar si Quisumbing og kadaogan sa kampanya batok sa kriminalidad sa Mandaue. Matod niya nitidlom sa kinaubsan nga ang-ang sa niaging tulo ka dekada ang mga krimen sa pagpatay, pagpanulis, pagpangawat, ug pagpanlugos.

Apan nisulbong ang mga kaso sa physical injuries. Dihang nahibawo nga kasagaran sa mga kaso sa pagpangulata naglambigit og lima lang ka bay kahilayan sa Mandaue, istrikto na niyang gipabantayan ang mga bay kahilayan, apil nang Sentral Bar nga gipanag-iya sa iyang ig-agaw.

* * *