Padak-anay sa braso
Wa pa gyod diay matagbaw ang National Food Authority (NFA) sa pagtugot ni Presidente Rodrigo Duterte sa ilang importasyon sa 250,000 ka tonelada nga bugas humay gikan sa ubang kanasuran. Di diay hingpit ang ilang kadaogan batok sa NFA Council nga kusganong nisupak sa importasyon tungod sa kabalaka nga maapektahan ang ani sa lokal nga mga mag-uuma.
Nitumaw sa pagsugod sa imbestigasyon sa House Committee on Agriculture and Food nga wa pa mahusay ang panagsungi nilang NFA Administrator Jason Aquino ug sa iyang labaw nga si NFA Council Chairman Jun Evasco.
* * *
Wa katabang paghusay sa kontrobersiya ang padayon nga pagpataliwa ni Presidente Duterte sa away nilang Evasco, nga usa sa labing suod niya nga sinaligan sa gabinete, ug Aquino, nga suod sa iyang anak nga si kanhi Davao City Vice Mayor Paolo Duterte ug iyang special assistant nga si Bong Go:
Bisan sa pagsupak ni Evasco, gidapigan sa presidente si Aquino sa paghimo og dugang importasyon sa bugas humay; apan
Bisan sa iyang pagdapig ni Aquino, gitugyan sa presidente ngadto ni Evasco ang pagtakda kanus-a himuon ang importasyon.
* * *
Sa iyang pag-atubang sa House niadtong Martes, nagpalaban si Aquino sa mga kongresista sa pagkumbinser ni Presidente Duterte nga langay ra kaayo ang gitakda ni Evasco nga unya pa sa Hunyo ning tuiga moabot ang 250,000 ka tonelada nga imported rice. Nipasidaan siya nga mahurot na ang NFA rice karong Abril.
Ipatawag sa mga kongresista sa sunod nga hugna sa ilang imbestigasyon silang Evasco ug ubang kadagkoan sa NFA, Council. Nga andam na sa ilang katin-awan nga di angayng madungan ang importasyon sa ani sa lokal nga mga mag-uuma.
Di sayon ang trabaho sa mga kongresista. Di sila managana pagkasaba, pag-insulto ug paghudlat sa mga kaatbang sa presidente. Apan unsa may ilang himuon kon ang nagkasungi pulos suod sa presidente?
Inay badlungon, gidasig hinuon ni Presidente Duterte ang kinawrasay sa mga tagduma sa Philippine Charity Sweepstakes Office (PCSO) nga silang Alexander Balutan ug Sandra Cam aron pagpadako sa kita ug pag-iban sa pangurakot. Ambot unsa ang kaayuhan nga gipaabot niya nga makuha sa padak-anay og braso nilang Evasco ug Aquino samtang niburot ang presyo sa bugas humay.