Trolls ug diktadura
Lanog nga panghupaw ang tubag sa mga tinun-an sa Sugbo sa sulti ni Dr. Crispin Maslog, kanhi peryodista sa Agence France-Presse (AFP), nga ang media di na sama kamahinungdanon karon kon itandi sa ilang panahon. Matod ni Maslog naibanan ang tingog sa media tungod sa karibal nga mga tingog sa social media.
Si Maslog mao’y dinapit sa media forum sa internet trolls nga gipasiugdahan sa Kapisanan ng mga Brodkaster ng Pilipinas (KBP) ug sa University of San Carlos niadtong Biyernes. Apil sa nanambong ang mga tinun-an nga umaabot nga mga sakop sa media.
* * *
Sa batan-on pa siyang maglilindog sa Dumaguete City, gisaway ni Maslog, 87, ang kapolisan. Pagkasunod adlaw, nakit-an niyang nitipas ang hepe aron nga di sila magkasugat sa dan. Matod niya di na ni mahitabo karon.
Niuyon kong Maslog nga di na monopoliya sa tradisyonal nga media ang pagtakda unsay balita ug mga panahom nga mabasa o mabati sa katawhan. Usa sa napamatud-an sa social media mao nga sayop ang pagtutok sa media sa labing kontrobersiyal nga mga opisyal ug mga ahensiya sa gobyerno ug labing dagkong dakbayan ug kalungsoran.
* * *
Apan aron di mapawong ang kaikag sa mga tinunan pagpadayon sa ilang mga kurso sa komunikasyon nisugyot ko nga nagpabilin nga labing mahinungdanon taliwa sa milyon ug usa ka tingog nga nisibaw sa karaan ug bag-ong media mao ang unod sa kasayuran.
Bisan gikan sa labing hilit nga isla ug mahitungod sa labing kabos nga manananggot, ang kamahuloganon ug kamabulukon sa ilang mga sugilanon mao’y makadani ug makahikap sa labing daghang kinabuhi.
* * *
Si Maslog nga mao say dinapit gabii sa pagpanumpa sa mga opisyal sa KBP Cebu Chapter nga gipangulohan ni Padre Roberto Ebisa sa dyRF niawhag sa mga batan-on sa di pagkalimot ug sa pagpupo sa mga pagtulon-an sa paglingkawas sa media ug sa katawhan gikan sa mga kuko sa diktadura ni Ferdinand Marcos.
Gidasig niya sila sa pagduyog sa pakigbisog sa pagpasidaan sa pamunoan ni Presidente Rodrigo Duterte ug sa ilang trolls sa internet sa di pagsunod ni Marcos nga nisuway pagpahilom sa media ug paggapos sa kagawasan sa pagpadayag sa katawhan aron lang palayason sa malinaw’ong rebolusyon.