Raket sa DFA
Sa kataposan, gituman na g'yud sa kadagkoan sa Department of Foreign Affairs (DFA) ang sibaw nga awhag sa pag-usab sa kontrobersiyal nila nga online passport appointment system. Nga inay mopasayon nihimo na hinuon nga mas lisod sa tungason nang daan nga tahas sa pagkuha sa mga pasaporte.
Sa karaang sistema, kinahanglan kang mangadlawon og linya. Apan dako ang kahigayonan nga mahikay ang pasaporte sud sa samang adlaw. Sa bag-ong sistema mahimong makabook gikan sa imong pinuy-anan. Apan dako ang kahigayonan nga siyam-siyaman una maka-tsamba og appointment.
***
Ang bag-ong sistema nga igo lang gikopya ni Foreign Secretary Alan Peter Cayetano sa gisugdan sa Sugbuanon nga kanhi foreign secretary Rene Almendras nagsandig sa kasayon sa bag-ong teknolohiya. Apan naputos sa daghan uyamot nga mga buslot.
Kon magkiat-kiat ka og book og appointment nga way tuyo sa pagkuha og pasaporte, mahimo ra. Igo ka rang i-ban sud sa pila ka adlaw, nga way epekto. Nagkiat-kiat man gani kay wa mag-apura sa pagbiyahe sa gawas sa nasud. Mao'ng epektibo ang bag-ong kausaban nga pabayran nang daan sa di pa maka-book online.
***
Apan ang epayment system sa DFA adto una ipatuman sa Metro Manila. Unya pa sa Agosto hingpit nga mapatuman sa Sugbo ug ubang bahin sa Pilipinas.
Sa ato pa, magpaabot pa ang mga Sugbuanon og laing duha ka buwan una makapahimus sa mas makiangayon nga sistema sa pagkuha og mga pasaporte. Pagka-karon padayon 'tang mag-antos sa taghap-taghap nga paagi pagkuha og online appointment.
***
Di hinuon ang kataphaw lang sa teknolohiya ang nakapabara sa sistema sa DFA. May mga pasangil sa kahiwian sa mga kukhan nga nipahimus sa depektuso nga mga lagda ug kataas sa pagsulbong sa demanda sa mga pasaporte sa nagkadaghan nga Overseas Filipino Workers (OFWs) ug mga turista.Angay lang nga imbestigahon sa labing daling panahon aron nga masilotan dayon ang mga nagpasiugda.
Usa sa labing seryuso nga pasangil mao nga napuno dayon ang online appointment system tungod sa konsabo sa mapahimuslanon nga travel agencies ug sa kurakot nga mga opisyal ug kawani sa DFA. Nisaad si Cayetano sa pagbungkag sa raket. Apan, sama sa uban pa niyang mga pasalig, wa pa matuman hangtod karon.