Tinuod nga SONA

Samtang nangandam nang mga senador ug mga kongresista sa pagpaminaw sa ikatulong State of the Nation Address (SONA) ni Presidente Rodrigo Duterte tulo ka Lunes gikan karon, Hulyo 23, atol sa pagbukas sa ikatulo ug kataposan nilang regular session, may pasiuna na nga mga pahibawo ang Malakanyang:

• Di si Brillante Mendoza kon dili si Joyce Bernal na ang direktor sa live TV coverage sa SONA; ug

• Di maghisgot ang presidente unsay nahimo ug wa mahimo sa iyang pamunoan sa niaging tuig kon dili mopadangat siya og mga mensahe gikan sa iyang kasingkasing. Ang niaging duha ka SONA ni Presidente Duterte naglakip sa paghulagway sa napatuman niyang mga programa (sa nihit nga mga higayon nga nakahunahuna siya sa pagbasa sa script nga giandam sa iyang mga tigpamaba ug mga sakop sa gabinete) apan gidominahan sa bisan unsay nahunahunaan niya samtang nagdiskurso.

Labing dakong bahin sa nangagi niyang mga SONA naglakip sa mga daghan uyamot nga mga butang, nga kasagaran way klarong kalambigitan sa usag-usa labi na sa direksiyon sa iyang pamunoan sa sunod tuig (hinaot nga wa magrepresentar sa aktuwal nga kahimtang sa iyang panghunahuna).

Way makalalis sa kalamposan sa trabaho nilang Mendoza ug Bernal sa pelikula ug telebisyon kon pasikarang dagkong kita sa takilya ug kadaghan sa nahakot nga mga pasidungog. Apan way nakaandam ni Mendoza paghulagway sa tag-as uyamot nga mga SONA sa presidente (usa ug tunga ka oras ang una ug duha ka oras ang ikaduha) nga way nahibawo unsay sunod hisgutan ug unsay kinatibuk-ang kahulogan.

Hinaot nga ang pait nga kasinatian ni Mendoza makahatag og mga pagtulon-an ug makahimong mas andam ni Bernal.

Bisan unsa pay isulti ni Presidente Duterte sa umaabot niyang SONA, di na malalis ang tinuod nga kahimtang sa nasud ug sa katawhan:

• Mas apiking kinabuhi, sukwahi sa iyang gipasalig nga kaharuhay, tungod sa iyang TRAIN Law;

• Kinatas-an ang inflation rate sa niaging lima ka tuig ug kinaubsan ang peso sa niaging 12 ka tuig; ug

• Iyang pamunoan ang labing unang nakabasiyo sa mga bodega sa bugas sa tibuok kasaysayan sa NFA karon, sa NGA sa Dekada ‘70, ug sa RCA sa Dekada ‘60.