Kagot sa bag-ang
Sukwahi sa iyang mga pangangkon, nahasol pag-ayo si Presidente Rodrigo Duterte ning dakong pagtibugsok sa iyang satisfaction rating sa survey sa Social Weather Stations (SWS) sa ikaduhang quarter karong tuiga. Bisan di niya angkunon atubangan sa publiko, ang presidente determinado nga magpabilin ang taas niyang popularidad.
Kay si Presidente Duterte ang labing nahibawo nga ang iya rang popularidad ang makapahilom sa mga pagsaway ug makahipos sa iyang mga kaatbang aron nga mapatuman ang iyang gisaad nga dagkong kausaban sa nasud, apil na ang pag-usab sa sistema sa gobyerno ngadto sa federal.
Mao nga sama sa nangaging pagtidlom sa iyang popularidad, makapaabot ta og dinalian nga mga lakang sa iyang pamunoan nga itumong sa pagkuha pagbalik sa pagsalig sa katawhan. Mangahas ko og agpas nga himuon niya ang mosunod:
• Paspasan ang pagpabaha sa baratong NFA rice sa kamerkadohan (hinaot nga pakapinan niya og dukol ang langayan nga mga opisyal sa NFA);
• Suspensuhon ang pipila ka probisyon sa TRAIN Law, labi nang excise taxes sa mga produkto sa lana; ug
• Manaktak na sab sa iyang mga tinudlo nga nagpabadlong sa katungdanan.
Ang pagsuspenso sa TRAIN mosukwahi sa mga tambag sa iyang economic managers nga gipangulohan sa usa sa labi niyang sinaligan nga si Finance Secretary Sonny Dominguez. Apan mas mahinungdanon alang sa presidente ang iyang popularidad kay sa pag-ulog-ulog sa mga sakop sa iyang gabinete.
Gawas pa, napamatud-ang bakak diay ang mga pasalig nilang Dominguez ug kaubanan nga makaayo ug di makadaot ang TRAIN. Di malalis nga usa sa dakong hinungdan sa pagtibugsok sa iyang rating mao ang pagsulbong sa presyo sa mga palaliton.
Mangahas sab ko og pangagpas nga sa mga takna sa iyang pag-inusara, hinaot nga makapalawom sa iyang pamalandong kon wa nay laing nagtikaw-tikaw, makaamgo siya sa dakong risgo sa pagkuwestiyon, pag-insulto ug pagbalikas sa Ginoo nga iyang namat-an og buot.
Pastilan, kon tinuod ang Ginoo nga iyang ginganlan og estupido, kon may mas makahuloganon diay’ng kapuslanan ang sala nga panulundon ug labaw sa tanan kon tinuod diay nga may impiyerno, di lang pagtibugsok sa popularidad ang iyang mahiagoman. Kangilo kaha sa gipasidaan nga way kinutoban nga pagkagot sa bag-ang.