Pabiling mahal ang bugas
Palihug tabang og paniid. Karong nakabuylo na ang National Food Authority (NFA) sa pag-apud-apod sa barato nilang bugas humay sa kamerkadohan sa Sugbo, Bohol, Negros Oriental, ug Siquijor, ato na g’yung masusi tinuod ba ang pasalig sa economic managers ni Presidente Rodrigo Duterte nga motidlom ang presyo sa commercial rice og hangtod sa P7 matag kilo.
Di makadasig ang pasiunang mga timaan. Nagpabilin ang naandan nga taas nga presyo sa commercial rice nga kasagarang paliton sa mga konsumidor sa kamerkadohan. Atong panid-an kon magsugod na ba og kanaog sa mosunod nga mga adlaw.
*** Ang pasalig nilang Budget Secretary Benjamin Diokno ug ubang economic managers sa pagbarato sa commercial rice kon moabot na ang importasyon sa baratong NFA rice kabahin sa ilang panghimakak nga ang krisis sa bugas humay nanukad sa Tax Reform for Acceleration and Inclusion (TRAIN) Law ni Presidente Duterte.
Matod ni Diokno ang tinuod nga sad-an sa pagsulbong sa presyo sa bugas humay mao ang kabanga sa mga tagduma sa NFA. Kansang kapakyas pagpugong sa pagkahurot sa NFA rice gipahimuslan sa mga negosyante sa bugas pagpaburot sa ilang ginansiya.
*** Nihapin nang daan silang NFA Administrator Jason Aquino ug kaubanan nga mahimong di dihadiha dayon nga mahitabo ang pag-us-os sa presyo sa bugas humay. Mahimong maabtan pa og pipila ka semana una mahurot ang karaang imbentaryo sa commercial rice nga taas pa ang presyo.
Nanagang na sang daan ang taga-NFA nga ang aktuwal nga laslas sa presyo sa bugas humay di sama kadako sa gipasalig sa economic managers. Inay P7 matag kilo, mahimong piso ngadto sa P3 ra.
*** Tabang na lang sab ta og bantay nga di masubli ang karaan nga mga binuang sa NFA rice:
•Ang accredited NFA retailers gipasanginlan ni Agriculture Secretary Manny Piñol nga nisagol sa NFA rice sa commercial rice ug gibaligya sa mas taas nga presyo sa commercial rice; samtang
•Ang NFA gipasanginlan uban sa abunda nga mga dokumento sa Grains Retailers Confederation (GRECON) sa Sugbo ug ni Cabinet Secretary Jun Evasco nga nipasimang sa NFA rice ngadto sa ilang kinaham nga commercial rice traders, apil nang asawa ni NFA Administrator Aquino nga taga-Bulacan.