Wa siyay bilib sa bugas

Idolo ni Presidente Rodrigo Duterte si Ferdinand Marcos. Bisan kon ang iyang inahan ang nangu sa mga protesta sa Davao batok sa diktadura ug bisan natudlo sa katungdanan pagbanos sa revolutionary government ni Cory Aquino niadtong 1986, labihan niyang biliba ni Marcos.

Nga nagbalikbalik og panganti nga mokanaog sa katungdanan kon ang anak ni Marcos, si kanhi senador Bongbong Marcos, ang mopuli. Daghang nahadlok nga samang Marcos mahimo sab siyang diktador. Apan may gihimo si Marcos nga angay unta niyang sundon nga wa niya himoa. Ug mahimong makahulga sa iyang pamunoan.

***

Kini mao ang determinadong paningkamot ni Marcos sa pagseguro sa abundang suplay ug sa ubos nga presyo sa bugas humay. Si Gobernador Imee Marcos sa Ilocos Norte, nihinumdom nga, bisan way balaod nga nagdili sa pagmahal sa bugas humay, gipasidan-an sa iyang amahan ang tanang buhatan sa kagamhanan nga ang pagsaka sa presyo sa bugas humay isipon niyang bangis nga krimen batok sa katawhan.

Wa mokumpiyansa si Marcos. Ang gitahasan sa pagbantay ug pagpahibawo dayon niya sa bisan unsang kausaban sa presyo sa bugas humay mao ang iyang kamaguwangang anak.

***

Si Imee nga 62 anyos na, 9 anyos dihang na-presidente si Marcos sa 1965, 13 anyos dihang nasublian sa 1969 ug 16 anyos pagdeklarar sa martial law niadtong 1972.

Atol sa Arangkada sa dyAB Abante Pa, Bisaya!, nitugan si Imee nga pagmata niya sa buntag sa unang mga adlaw nila sa Malakanyang gisugo siya sa pagsusi dayon tagpila ang gantang sa bugas humay ug pagpahibawo dayon sa iyang amahan kon may pagsaka, bisan unsa kagamay.

***