Gugma ni Margielyn
Samtang nag-roller skating sa Fuente Osmeña Rotunda ang katabang nga si Julie, gikuptan sa usa ka lalaki ang iyang kamot. Dihang nasuko si Julie, gisukna siya sa lalaki nga may uyab ba diay nga di magpakupot sa kamot?
Didto pa nahibaw-an ni Julie nga ang lalaki, nga nagpailang panday nga si Lito, nangulitawo diay sa telepono sa pamilyang iyang gitrabahoan ug gibinuangan og sugot sa anak sa iyang agawon nga nagpailang Julie. Usa sa bunga sa kapin sa duha ka dekada nilang panaghigugmaay bag-o lang nakadaog og medalyang bulawan sa skateboarding sa Asian Games.
***
Niturok ang talagsaong gugma sa skateboarding ni Margielyn Didal sa nagpangedaron pa og 12. Namatikdan ni Julie nga kalit lang nihunong ang ikaupat niyang anak sa karaan niyang kalingawan sa bisikleta ug basketbol ug dugay na kaayong nabalik sa iyang mga sugo.
Iyang nahibaw-an nga ang halin ni Margielyn sa gipamaligyang pamantalaan ug ice water giabang diay og skateboard (P50 kada oras) ug nagtagu-tago sa pagduwa kay gipangdakop man ang iyang kaubanan nga nasakpan nga nag-skateboarding sa kadalanan sa Lahug ug kasilinganang mga barangay.
Di sama kamasinabuton si Lito sa bag-ong duwa sa iyang anak. Gipasidan-an niya si Margielyn sa makadaghang higayon ug dihang wa g’yud patuo gibugha niya ang skateboard. Nilayas si Margielyn sa ilang bay maong napugos ang mga ginikanan pagpaundayon sa iyang determinasyon.
Gipalitan siya ni Julie og tag-P300 nga skateboard nga molungtad lang og pila ka adlaw. Hangtod nga nanghawod na si Margielyn sa mga torneyo sa nagkalainlaing bahin sa nasud ug kalibotan. Nabuhong sa labing maayong skateboards nga dugay nang naibgan.
* * *
Tungod sa skateboarding, naputol ang ngipon ug napiang ang tiil ni Margielyn. Si Julie ang naghilot niya ug human sa pila ka adlaw nibalik si Margielyn sa pagdominar sa mga torneyo. Natapakan nang putol niyang ngipon maong tam-is og pahiyom nga nipang-it sa gold medal.
Mabulukong pasidungog ang nagpaabot ni Margielyn sa iyang pagbalik sa Sugbo duha ka semana gikan karon. Usa sa nimatuto sa iyang pamilya, si Cebu City Councilor Mary Ann delos Santos, niingon nga ang kadaogan ni Margielyn makapaspas sa skatepark sa SRP nga gisaad ni Mayor Tommy Osmeña.