Amnestiya ni Trillanes
Sukwahi sa pasangil ni Presidente Rodrigo Duterte nga wa matuman nilang Senador Antonio Trillanes IV ug kaubanan ang duha ka panginahanglan sa amnestiya sa armadong mga pag-alsa nga iyang gipasiugdahan batok sa pamunoan ni kanhi presidente Gloria Macapagal Arroyo, may mapakita ang grupong Magdalo nga mga dokumento nga magmatuod nga:
•Nisumiter sila og application forms sa amnestiya niadtong Enero 2011, duha ka buwan human sa amnesty proclamation ni kanhi presidente Noynoy Aquino; ug
•Nihimo sila og general admission of guilt sa kalapasan sa military rules ug Revised Penal Code.
***
Di lang usa kon dili duha ka proklamasyon ang giluwatan ni Aquino pagpasaylo sa mga sundawo ug mga polis nga naapil sa Oakwood mutiny niadtong 2003, Marines stand-off niadtong 2006, ug atake sa Manila Peninsula niadtong 2007. Unang giluwatan ang Proclamation 50 niadtong Oktubre 11, 2010. Apan tungod sa pagkuwestiyon sa mga magbabalaod sa pipila ka probisyon, giluwatan sa Malakanyang ang Proclamation 75 niadtong Nobiyembre 24, 2010.
Giaprobahan sa Senado ang proklamasyon niadtong Disyembre 7, 2010 ug nisunod pagdason ang House of Representatives niadtong Disyembre 13, 2010.
***
213 sa mga kongresista ang niuyon samtang pito ang nisupak. Apil sa nisalikway sa proklamasyon:
•Sugbuanong kanhi kongresista nga karon konsehal sa Dakbayan sa Sugbo, si Pastor Alcover Jr. sa ANAD Partylist;
•Kanhi kongresista sa Siquijor nga si Orlando Fua; ug
•Mga paryente ni Arroyo nga silang Dato Arroyo sa Camarines Sur ug Iggy Arroyo sa Negros Occidental.
Ni-abstain ang igsuon ni Senador Migz Zubiri nga si kanhi kongresista Jose Ma. Zubiri III.
***
Naapil sa amnestiya ug mahimong ipadakop sab ni Presidente Duterte ang mga opisyal nga silang: 2Lt. Edgardo Aguilar, 2Lt Leopoldo Apellanes, Lt. JG Arturo Pascua Jr., Lt. JG Ceferino Checa, 2Lt. Jonnell Sangalang, Ens. Cesar Carmel Tamba, 2Lt. Jeoffrey Tacio, 2LT Norman Spencer, Lt. SG Andy Torrato, Lt. SG Manuel Cabochan, Lt. Norberto Santiago, 2Lt. Jeveehboy Macarubbo, Lt. Billy Pascua, 1Lt. Francisco Ashley Acedillo, 1Lt. Jonathan Costales, Capt. Gary Alejano, Capt. Segundino Orfiano ug Lt. Eugene Louie Gonzalez.
Si Acedillo, taga Lahug, Cebu City, nahimong kongresista niadtong 2013. Dungan silang Alejano, taga Negros Occidental, nga nipahibawo nang modagan pagka senador sunod tuig.