Maoy unang namilok
Ug nipilok ang militar. Human sa pila ka adlaw nga pagpaabot ipatuman ba nila ang sugo ni Presidente Rodrigo Duterte sa pagdakop ni Senador Antonio Trillanes IV, nipahibawo ang Department of National Defense (DND) nga ilang paabuton ang hukom sa Korte Suprema sa petisyon ni Trillanes pagpangayo og temporary restraining order batok sa proklamasyon nga nibasura sa iyang amnestiya.
Dako ning kapildehan ni Presidente Duterte. Wa tuohi sa DND ug Armadong Kusog ang sugo sa iyang Proclamation No. 572 sa dinaliang pagdakop ni Trillanes ug pagbalhog niya pagbalik sa prisohan.
* * *
Sa pagbalik ni Presidente Duterte sa Pilipinas karong buntag, nga mas sayo kay sa gitakda kay giibanan man og usa ka adlaw ang iyang pagduaw sa Israel ug Jordan, gawasnon pa si Trillanes. Mahimong di lang gihapon mogawas sa Senado, apan magpabiling gawasnon ang giisip nga labing higpit niyang tigsaway.
Wa matuman ang plano sa presidente. Nga klarong nibilin ni Justice Secretary Menardo Guevarra isip officer-in-charge sa Republika aron maoy mangunay og patuman sa makapakugang niyang proklamasyon. Mabawo sa gipaabot unta nga pagkatanggong nang Trillanes isip sinugatan.
* * *
Makasagang sa kasuko sa presidente ang kapolisan. Kay di man nila magamit ang proklamasyon aron pagsikop ni Trillanes. Ug napakyas man ang Department of Justice pagkuha dayon og warrant of arrest sa Makati City Regional Trial Court.
Mas kasab-anan sa presidente ang militar. Kay mahimo man untang madakop nila si Trillanes bisan way arrest warrant. Kon nituo pa lang ang DND ug AFP nga mahimo rang ipadayon ang court martial proceedings batok ni Trillanes.
* * *
Apan ang kadagkoan sa DND ug AFP klarong wa sab kaandam sa pagpanalipod sa laktod nga proklamasyon. Kay nagbaha dayon ang mga ebidensiya nga nihimakak sa kinakusgang mga sukaranan sa proklamasyon – nga wa mo-apply og amnestiya ug way admission of guilt si Trillanes.
Tingali nipatigbabaw ang propesyonal nga kasundalohan sa DND ug AFP nga nakaamgo nga ang pagbasura sa amnestiya ni Trillanes tungod lang sa pagkawa sa application form maoy paghimong ulitawo ug dalaga sa magtiayon tungod lang kay nawa ang ilang marriage contract ug pagbuhi sa usa ka minatay tungod lang kay nawani ang iyang death certificate.