Mga bakante sa gobyerno
Tungod sa mas dagkong suholan ug mga benepisyo, gipaabot nga dugokan ang Government Job Fair alang sa bakanteng mga katungdanan sa gobyerno sa Cebu Technological University (CTU) nga tambayayongan sa Civil Service Commission (CSC) sa Central Visayas karong Huwebes ug Biyernes, Oktubre 18 ug 19.
Gipahibawo nilang CSC 7 Regional Director Editha D. Luzano ug Assistant Regional Director Ariel B. Bacatan nga kapin sa 200 ka trabaho ang mapilian sa mga aplikante sud sa main campus sa CTU sa M.J. Cuenco Avenue sa Dakbayan sa Sugbo atol sa duha ka adlaw nga kalihokan.
***
Moapil sa Government Job Fair ang mosunod nga mga buhatan sa gobyerno: Commission on Elections (COMELEC); National Economic and Development Auhtority (NEDA); Talisay City District Hospital; Bureau of Fire Protection (BFP); Department of Health (DOH); Department of Education (DEPED); Talisay City Government;
Department of Social Welfare and Development (DSWD); Philippine Drug Enforcement Agency (PDEA); Cebu Normal University (CNU); Technical Education and Skills Development Authority (TESDA); Cebu Technological University (CTU); National Irrigation Administration (NIA); Department of Environment and Natural Resources (DENR); ug National Food Authority (NFA).
***
Alang sa dugang detalye sa bakanteng mga trabaho ug mga panginahanglan, mahimong maminaw sa mga tulomanon sa DYAB 1512 Abante Pa, Bisaya!, MOR 97.1 Lupig Sila! ug ABS-CBN Channel 3 nga niabag sa pagsangyaw sa Government Job Fair.
Matod ni Atty. Bacatan gi-upload sab nila ang kinatibuk-ang listahan sa bakanteng mga trabaho sa Facebook page sa CSC 7 (cscro7). Mahimo sang subayon ang mga bakanteng trabaho sa Job Portal sa ilang website (csc.gov.ph).
***
Sa iyang pagtambong sa Arangkada sa DYAB Abante Pa, Bisaya! gahapon, may mahinungdanong tugon si Atty. Bacatan: Lahi sa pagpangaplay sa pribadong kompaniya nga gikinahanglan ang resume, kinahanglang isumiter ang upat ka pahina nga Personal Data Sheet (PDS) nga i-apud-apod atol sa kalihokan.
Nisugyot hinuon si Bacatan nga mas maayong i-download ang PDS gikan sa ilang website aron nga matubag daan (mahimo sang i-dowload og apil ang giya unsaon pagtubag ang mga pangutana sa PDS) ug mahimoan og daghang kopya aron nga makapatuyang og pangaplay sa tanang bakanteng trabaho kutob sa motakdo sa iyang edukasyon ug kasinatian.