Mga sundawo sa Customs
Maklaro na sa mosunod nga mga adlaw ang dugang detalye unsaon pagbanos sa kasundalohan ang pagpalihok sa Bureau of Customs (BOC). Ang Department of Finance nga maoy nagduma sa BOC mapugos sa pagdalidali pag-umol sa mga lagda sa giawhag ni Presidente Rodrigo Duterte nga pagtangtang sa tanang opisyal ug kawani sa BOC alang sa hingpit nga military takeover.
Legal bang mapatuman ang masuk-anon nga sugo sa presidente? Mahimo bang i-floating status ang kapin sa 5,000 ka kawani sa 17 ka collecton districts sa tibuok nasud? O sama sa nangaging mga sugo sa presidente makakita sila og technicality nga makabasura ini?
Si Presidente Duterte gipahinumdoman ni Kongresista Ruffy Biazon, kanhi komisyonado sa BOC, nga may tulo ka mahinungdanong trabaho ang customs: Revenue collection, trade facilitation, ug border security. Asa man nila ang itugyan sa militar aron nga gawas nga mabadlong ang smuggling sa ilegal nga drugas ug ubang kontrabando mapalambo sang koleksiyon sa buhis?
May igo bang mga sundawo ug may tukma ba silang katakos nga makabanos sa tanang gimbuhaton sa BOC? Unsa may kinahanglan nilang mahimo una ibalik ang BOC ngadto sa mga sibilyan?
***
Kinahanglang tun-an nilang Heneral Rey Leonardo Guerrero ug ubang mga sundawo ang komplikadong burukrasya sa BOC. Apil ning mosunod nga mga lagda sa importasyon:
•Kon di masumiter ang entry form sud sa 30 ka adlaw human sa pagdunggo sa kargamento, mahimo nang sakmiton sa gobyerno;
•Mosusi sa importasyon ang BOC, Bureau of Import Services sa Department of Trade and Industry ug Department of Agriculture alang sa Minimum Access Volume (MAV) Import Certificate;
***
•Ang import documents naglakip sa Commercial invoice/ Pro forma invoice, Bill of lading o air waybill, Certificate of origin, Packing list ug Special certificates/import clearance/ permit; ug
•Way buhis ang mga kargamentong P10,000 ug napu ka kilo paubos, 6.7% sa kasagarang produkto, 65% sa asukar, 50% sa cereals, 3% sa raw materials ug 10% sa finished products.
Hinaot nga ilang makat-onan sa labing daling panahon. Kay kon magkadaghan ang matanggong nga mga kargamento, samtang nagtuon sa bag-o nilang trabaho, magkadako sang tentasyon sa pagpanlaktod bugti sa makaiibog nga padangog.