Paglubay ug pagbalitok
Hingpit na gyong gitahan ni Presidente Rodrigo Duterte ang gahom sa pag-umol sa ekonomikanhong mga lagda sa iyang pamunoan ngadto sa tulo niya ka economic managers. Maong sayon rang nibakwi sa gihangop unta sa kadaghanan niyang sugo sa pagsuspenso sa ikaduhang hugna sa buhis sa mga produkto sa lana sugod karong bag-ong tuig.
Ngil-ad nang daan ang paglubay-lubay sa iyang baruganan. Mas laksot nga human nagpakabana alang sa katawhang nagkalisudlisod sa gipamugos niyang buhis, karon iya silang gilawog sa tirong nga gusto unta niyang likayan pila pa lang ka adlawng nilabay.
***
Bisan nagpapili pa alang sa labing taas nga katungdanan sa nasud, wa na itago sa presidente ang kakuwang sa iyang interes sa ekonomiya. Gigahin ang tibuok kampanya pagbalikbalik sa iyang pasalig nga sumpuon ang ilegal nga drugas sud lang sa tulo ka buwan human siya makabanos sa Malakanyang.
Dihang gipangutana sa iyang plataporma sa ekonomiya atol sa presidential debates, igo lang nitubag nga mangopya ra siya sa mga plataporma nilang Mar Roxas, Miriam Santiago ug ubang mas suhito niyang mga kaatbang. Uwahi nang nahibaw-an sa mga botante nga wa siya magkomedya.
***
Way makalalis sa katakos sa economic managers ni Presidente Duterte nga silang Finance Secretary Sonny Dominguez nga taga Davao, Budget Secretary Benjamin Diokno nga taga Batangas ug Economic Planning Secretary Ernesto Pernia nga taga Bohol.
Apan napamatud-an nang sayop ang ilang pasalig nga gasa kaharuhay ang Tax Reform for Acceleration and Inclusion (TRAIN) Law. Ang gipasiatab nga mas gamayng income tax natabonan sa makalilisang nga pagsulbong sa presyo sa tanang palaliton ug panginahanglan.
***
Gipahibawo ni Diokno nga usa sa nakapakumbinser ni Presidente Duterte pagpadayon sa pagpatong sa P2.24 nga buhis sa matag litro sa krudo ug gasolina sugod sa sunod buwan mao ang kabarato na sa presyo sa lana sa merkado sa kalibotan.
Dakong binuang ang paghimo og malungtarong ekonomikanhong mga lagda pinasikad sa mga butang nga di makontrolar, sama sa ma-usab-usabong presyo sa lana. Ambot nganong wa nila pahibaw-a ang presidente nga nisaka ang presyo sa lana sa unang duha ka adlaw sa patigayon karong semanaha ug kon magpadayon mahimong mahiagom ta og usbaw sa presyo sa lana sunod semana.