Mga agianan sa Balangiga
Sa labing unang higayon human sa 117 ka tuig, ang mga kampana sa Balangiga, Eastern Samar, nga saksi sa bayanihong pagsukol sa ilang katiguwangan batok sa mga langyaw, maoy nipahibawo sa mga parokyano sa pormal nga pagsugod sa Misa de Gallo ganina.
Gawas lang kon duna na say nitumaw nga laing kakulian nga, human sa kapin sa siglo nga panagbuwag sa lungsod ug sa mga kampana, lisod tuohan nga di mabuntog, bisan ang nag-alintabo nga panagsungi nilang Presidente Rodrigo Duterte ug sa pipila ka obispo ug kaparian sa Simbahang Katoliko.
***
Daghang nagpakisayod sa among programang Arangkada sa dyAB Abante Pa, Bisaya! unsa ang labing mubo, labing sayon ug labing barato nga ruta gikan sa Sugbo paingon sa Balangiga. Naghinamhinam sila nga makasud-ong sa makasaysayanon nga mga kampana. Sa di pa mabiktima sa bag-ong nitumaw nga mga maniobra.
Kay may mga politiko na nga niawhag nga buwagon ang mga kampana. Ug namuyboy nang kadagkoan sa National Museum pinaagi sa paghinumdom sa dako nilang tabang pagpreserbar sa hapit na madugta nga karaan nga mga simbahan dihang nibalibad ang kaparian sa Balangiga. Nagpatabang dayon ko sa mga tigpaminaw. Nga nisugyot sa nagkalainlain nga mga agianan gikan ug paingon sa Sugbo ug Balangiga. Kay wa may direkta nga sumpay ang Sugbo ug Balangiga, kinahanglan nga moagi sa daghan uyamot nga kalungsoran ug mga dakbayan sa mga isla sa Leyte ug Samar.
Among nahibaw-an nga ang labing mubo ug labing sayon nga ruta mao ang kinamahalan. Ug ang labing barato nga ruta mao sab ang kinalay-an.
***
Ang labing sayon nga di kaayo dako ang gasto ug kinadaghanan og mga sakyanan sa yuta ug sa dagat nga kapilian mao ang ruta nga Cebu City-Ormoc CityTacloban City-Balangiga ug pabalik. Mahimong magda og kaugalingong mga sakyanan ang mga pamilya ug mas dagkong grupo aron nga mas sayon pa g’yud ang pagbiyahe paingon sa Balangiga.
Ang labing mubo ug labing sayon apan labihan sang mahala mao ang pagsakay og ayroplano gikan sa Mactan paingon sa Tacloban ug pagpakyaw og van paingon sa Balangiga. Nihit ang direktang flights ug nalisang sa kataposan nakong lili kay kapin sa P10,000 ang round trip nga plitehan.