Mga pangutana sa pagpawong
Bisan gisugo na sa National Telecommunications Commission ang mga kompaniya sa telepono pagpawong sa cell sites duol sa fluvial procession (Lapu-Lapu City, Mandaue City, ug Cebu City) ug solemn procession (Cebu City) karong Sabado ug sa Sinulog Grand Parade (Cebu City) karong
Domingo, wa gihapoy klarong kasayuran ang publiko kon:
•May hulga ba sa pagpamomba ginamit ang mobile phones?; o
•Gipaundayonan lang sa kapolisan ang ilang gihimo sa nangaging katuigan, labi nang way nikuwestiyon sa legalidad sa ilang lakang?
Makatabang tingali sa pagtimbang-timbang sa kamakiangayon sa pagpawong sa cell sites ang mosunod nga mga pangutana sa Federal Communications Commission pagpangayo og katin-awan sa samang kontrobersiya sa Estados Unidos:
•Unsay mga sukaranan sa mga pagpawong sa cell sites, giunsa pagpatuman, unsay mga balaod nga gipasikaran ug unsay mga balaod nga makapugong?
•Giunsa pagpanalipod sa nangaging mga pagpawong ang publiko, unsay mga kaso nga gigamit ang cell sites paghulga sa publiko ug unsay natabang sa pagpawong sa pagbadlong sa mga hulga?
***
•Unsay mga balaod nga mosegurong alang sa kaayuhan sa publiko ang pagpawong, unsay mga sitwasyon nga angayng pawngon, unsa kataas ang pagpawong ug unsa kapaspas ang pagbadlong sa mga hulga?
•Unsay mga risgo sa pagpawong, unsaon pagtubag sa mga buhatan sa gobyerno sa katalagman o emerhensiya kon pawong ang cell sites, unsay epekto ngadto sa mga may kakulian sa panglawas, unsay kalihokan sa mga konsumidor nga maigo ug unsay epekto sa ekonomiya?
***
•Unsay kinahanglang andamon nga alternatibong mga paagi sa komunikasyon, may mga lakang bang mahimo pagpagamay sa mga dapit nga maapektahan ug pagpamubo sa higayon sa pagpawong, unsaon pagpahibawo ug kanus-a pahibaw-on ang publiko, tug-anan ba sa hinungdan sa pagpawong ug duna bay laing mga paagi sa pagpanalipod sa publiko gawas sa pagpawong sa cell sites?
•May katakos bang mga kompaniya sa telepono pagtugot sa publiko pagtawag sa kapolisan ug mga tambalanan bisan pawong ang cell sites ug mapahibawo ba nilang publiko kon may nag-ung-ong nga hulga sa pipila ka dapit kon way signal?
•Kinsay opisyal nga makapawong sa cell sites, kinsay ang makapabalik sa signal, kinsay makasubli sa iyang desisyon ug unsaon pagtawag kon may dinalian nga kausaban sa mga panghitabo?