Nangahilom kay gisampolan

Dihang may mga obispo sa Simbahang Katoliko nga nangahas sa pagsukol ni Presidente Rodrigo Duterte ug nisaway sa tanang pagbinastos ug pagpakauwaw sa iyang buhatan, wa siya maglangan. Iya dayon silang gisampolan. Gipasanginlan og bisan unsa na lang kalapasan. Gikan sa pamabaye ngadto sa pagbolsa sa kolekta sa simbahan. Di siya kinahanglang mopresentar og ebidensiya. Tungod sa presidential immunity, di siya makiha.

Unsay epekto? Nahipos ang kaparian ug mga obispo. Maihap na lang sa tudlo ang nagpabiling isog. Ang ubang wa pa hingpit molingiw ug mangiyugpos, kutob na lang sa hagawhaw.

Dihang may mga mayor nga nisuway pag-insistir nga bisan sa popularidad ni Presidente Duterte sila gihapon ang tinuod nga hawod sa ilang mga teritoryo, gisampolan dayon niya silang Mayor Jed Mabilog sa Iloilo City, Mayor Vic Loot sa Daanbantayan, ug Mayor Tommy Osmeña sa Cebu City.

Human nilayas si Mabilog, human nibahag ang ikog ni Loot ug human nitak-om si Osmeña, palihug tabangi kay naglisod mi og pangita duna pa bay mga mayor karon nga mangpa-pogi og panghilabot sa kampanya sa kapolisan batok sa ilegal nga drugas.

***

Dihang nagpabantang si kanhi chief justice Maria Lourdes Sereno sa pagbatbat sa mga balaod nga posibleng nalapas ni Presidente Duterte sa pagdasig sa laktod nga mga pagpamatay sa gidudahang mga durugista, nga kasagaran kabos ug gagmay, wa lang hulgaa og impeachment utro sang gilaktod sa pagpalagpot pinaagi sa quo warranto.

Karon, kinsa may huwes nga mangahas pagsukwahi sa bisan unsa na lang argumento nga mahunahunaan sa presidente ug iyang mga abogado? May nangisog tuod pagbalibad sa pagpapriso ni Senador Antonio Trillanes apan may nagdumili sab pagpa-piyansa ni Maria Ressa.

Karong nabalhog na sa prisohan bisan sud lang sa pipila ka takna si Ressa, nga nakadawat na sa labing bantogan nga kalibotanong mga pasidungog, kinsa pa may sakop sa media nga way pugung-pugong nga mosaway sa iyang mga binuhatan ug mobisto sa gidudahang kahiwian niya, sa mga sakop sa iyang pamilya ug sa iyang labing suod nga mga hinanib?

Sama sa mga pari ug mga obispo, maihap na lang sa tudlo. Ang wa pa hingpit nga molingiw ug mangiyugpos, pagaw nga hagawhaw na lay matuaw.