Kabalaka sa pagmahal sa lana
Gikabalak-an nga ang gamayng laslas sa presyo sa lana gahapon sundan sa sunudsunod ug mas dagko nga usbaw sa mosunod nga mga semana. Sa unang adlaw pa lang sa patigayon niadtong Lunes, nga maoy unang adlaw sa ikaduhang quarter karong tuiga, nisaka na ang presyo sa lana sa merkado sa kalibotan.
Ang labing dakong hinungdan mao ang kabalaka sa kaluya sa kalibotanong ekonomiya nasapawan sa mas dinaliang kahadlok sa kakuwang sa suplay tungod sa paglaslas sa produksiyon sa OPEC ug OPEC+ bale og 1.2 milyones ka baril sa lana matag adlaw.
* * *
Laing hinungdan mao ang paghigpit na sa Estados Unidos sa pagpatuman sa iyang ekonomikanhong mga silot batok sa Iran ug Venezuela, duha sa labing dagkong mga tinubdan sa lana:
• Giawhag sa mga Amerikanhon ang Malaysia ug Singapore ug ubang kanasuran sa paghunong na pagpangompra og lana gikan sa Iran; ug
• Padayong giapiki ang pagbaligya og lana sa Venezuela sa ubang kanasuran, gawas nga gipaningkamotan nga ang kita sa lana di magamit ni Presidente Nicolas Maduro, gidudahan gani nga ang blackouts sa Venezuela resulta sa sabotahe sa Estados Unidos.
* * *
Makatabang sab sa pagsulbong sa presyo sa lana sa mosunod nga mga adlaw ang maayong dagan sa sabutsabot tali sa mga representante sa China ug Estados Unidos sa pagpugong sa nag-ung-ong nilang gubat sa patigayon.
Kon di mahinayon ang sinagpaay og dagkong buhis sa exports sa duha ka labing dagkong patigayon sa kalibotan, gipanghinaot nga maibanan kon di man kapugngan ang pagluya sa kalibotanong ekonomiya.
* * *
Sa pikas nga bahin, nagpabiling alas sa mga konsumidor sa pagpugong sa pinatuyangan nga paglumpayat sa presyo sa lana ang shale oil producers sa Estados Unidos. Kay wa may apil sa konsabo sa artipisyal nga paglaslas sa produksiyon, gawasnon silang mopabaha og lana sa merkado sa kalibotan.
Nga makatagbaw sa politikanhong interes ni US President Donald Trump. Kay ang lunod patay niyang mga dumadapig, nga buta nga nagpaluyo niya bisan sa tanang pakauwaw ug eskandalo, kinahanglang tagbawon og mas baratong gasolina. Maong matag higayon nga mosulbong ang presyo, modayon og pasidaan si Trump sa Saudi Arabia, nga di mahimong mopasuko niya, sa pagdugang sa ilang produksiyon sa lana.