Sagpa sa institusyon
Gawas sa pagkalambigit sa kinatas-ang opisyal sa kapolisan sa labing menos usa ka kaso sa pagtabon sa ninja cops, ang nangalisbo nga operasyon sa kapolisan sa Pampanga unom ka tuig nang nilabay nimatuod sab sa ka-inutil sa Philippine National Police (PNP) pagpanilhig sa iyang nataran.
Kay di pa igo nga gisiyam-siyaman ang mga kasong kriminal ug administratiba batok sa 13 ka gipasanginlan nga mga polis, wa pa g’yud mapahamtang ang orihinal nga silot nga administratiba sa pagtaktak nila sa katungdanan ug wa pang kaabot sa korte ang mga kasong kriminal batok nila.
Mahimong ni-ungot ang mga kaso sa mga polis nga gipasanginlan nga ni-recycle sa 160 ka kilo nga shabu nga ilang nasakmit niadtong 2013 tungod sa way klaro nga sistema sa PNP sa pag-imbestigar sa mga kaso sa ilang mga sakop.
Mahimo sab nga wa kalihok ang mga kaso tungod sa kamatinabangon sa ilang padrino nga si PNP director Oscar Albayalde. Kinsa mahimong nanawag sa ubang mga tagduma sa kaso gawas ni Direktor Heneral Aaron Aquino sa Philippine Drug Enforcement Agency aron di mataktak ang iyang mga tawo.
* * *
Gimando ang pagtaktak sa mga sakop ni Albayalde niadtong 2014. Naabtan og laing kapin sa tuig una nila nadawat ang dismissal order. Nilabay na sab ang kapin sa tuig una nahusay ang ilang motion for reconsideration. Si Aquino ang gitahasan pagpatuman sa dismissal order isip hepe sa kapolisan sa Central Luzon.
Apan gitawgan siyang Albayalde. Maong inay taktakon, gilabay ni Aquino ang mga polis ngadto sa Mindanao niadtong 2016. Sa pag-retiro ni Aquino niadtong 2017, ang nipuli niya nga si Police Brigadier General Amador Corpus nipahiyos dayon sa silot ngadto na lang sa usa ka ranggo nga demosyon.
* * *
Wa kabadlong si Albayalde sa iyang mga sakop samtang siya pa ang hepe sa kapolisan sa Pampanga. Gani, girelibohan siya sa katungdanan tungod sa pagpangiyugpos lang sa mga taho nga ang 13 ka polis nga niapil sa operasyon niadtong Nobyembre 29, 2013 pulos nakapalit og bag-ong SUVs.
Apan ang bulilyaso wa kapugong sa iyang mga promosyon. Nadugangan hinuon ang iyang katakos sa pagpanalipod sa iyang mga sakop pinaagi sa pagpahimutang nila sa labing makabuhong nga katungdanan.