Alas ni Robredo
Pulos wa paabota ang labing uwahing mga lakang nilang Presidente Rodrigo Duterte ug Bise Presidente Leni Robredo taliwa sa nagpadayon nilang panagsungi sa kampanya batok sa ilegal nga drugas:
•Inay isalikway pinaagi sa naandan niya nga panginsulto ang pag-awhag ni Robredo pinaagi sa kalibotanong Reuters news agency nga sublion ang kampanya, si Duterte nitanyag sa paghimo niyang drug czar; ug
•Inay isalikway nga lain na sang pakauwaw o ba kaha komedya ra g’yud ang paghimo niya nga tagduma sa kampanya batok sa ilegal nga drugas, gidawat ni Robredo ang tahas.
***
Ang mga dumadapig nilang Duterte ug Robredo pulos sab wa magpaabot nga seryuso ang tanyag sa presidente ug nga dawaton sa bise presidente ang gitanyag nga katungdanan:
•Labing suod sa presidente nga mga senador, Bong Go ug Bato dela Rosa, nga maoy labing makalili sa panghunahuna ni Duterte, nipasangil nang daan ni Robredo nga igo rang magpa-cute ug mopagara sa drug lords; ug
•Mga haligi sa oposisyon, Liberal Party president Kiko Pangilinan ug kanhi senador Antonio Trillanes, nisalikway nga taphaw ug way klarong gahom ang gitanyag nga katungdanan.
***
Bisan gidawat nang Robredo, wa pa g’yud maklaro ang tanyag ni Duterte:
•Drug czar ba g’yud si Robredo o pangabaga lang sa
Inter-Agency Committee on Anti-Illegal Drugs (ICAD)?
•Unsa man ang mga gahom ni Robredo, pagtambong ba lang sa mga tigom sa 21 ka buhatan ubos sa ICAD o makapalihok siya sa kapolisan, militar, ug ubang ahensiya?
•Makatambong ba siya ug busa makatingog sa mga tigom sa gabinete o maghuwat lang kanus-a konsultahon sa presidente?
***
Mahimong sabotaheon ni Duterte si Robredo pinaagi sa pagsugo nga ipadayon ang inadlaw’ng pinatyanay sa gidudahang mga durugista bisan unsay isulti sa bise presidente. Mahimo sab nga iyang hatagan si Robredo og higayon pagsuway sa mas makitawhanong kampanya nga moisip sa ilegal nga drugas nga health problem. Apan makatugot ba siyang molampos si Robredo sa kampanya nga iya nang giangkong napakyas?
May alas hinuon si Robredo. Makabasa na siya sa opisyal nga mga dokumento, ug busa makahibawo na sa tanang tinagoan, sa kampanya batok sa ilegal nga drugas. Nga dugay nang gidemanda apan wa pa g’yud makuha sa Korte Suprema.