Bugtong kapuslanan
Nakahunahuna unta ko nga di manginlabot ning akong lindog ug sa akong tulumanon sa radyo sa niulbo nga kontrobersiya sa hapit na mapupos nga prangkisa sa ABSCBN Corporation, ang kompaniya nga akong gialagaran sa niaging 25 ka tuig.
Kay bisan unsay akong isuwat o isulti mamantsahan
sa akong dakong utang kabubut-on sa sibyaanan nga maoy tinubdan sa akong panginabuhi ug nakatabang sa among pamilya. Gawas nga malubong lang sa kaliboan ug usa pa ka baruganan sa ubang mas suhito, mas takos ug mas makiangayon nga mga baruganan labot sa among umaabot.
***
Apan di mahimong mangiyugpos ug magpakahilom lang. Kay kon paundayonan ang kaikog ug panagana may kahigayonan nga mahimong tinubdan sa dakong pagmahay kon unsa man ang sunod nga mga panghitabo.
Sama sa henerasyon sa mga magsisibya ug mga peryodista kalim-an ka dekada na ang nilabay nga nabulit sa way kinutoban nga mga sukmat: Nga kon wa pa unta sila nagpa-antaw ug nipaundayon lang sa pagpawong sa ilang mga sibyaanan ug pagtak-op sa ilang mga pamantalaan, di unta sama kasayon ang pagluok sa diktadura ni Ferdinand Marcos sa kagawasan sa pagpadayag.
***
Nihangyo ko sa kadagkoan sa ABS-CBN nga moretiro na sa niagi pang tuig. Tungod sa kakulian sa kahimsog sa akong asawa, nipasabot ko nila nga nakahukom ko nga di makiangayon alang niya nga tungod sa akong mga gimbuhaton di mi magkita sa tibuok adlaw ug, kon may moulbo nga dagkong mga panghitabo, hasta sa gabii.
Samtang nangita sila og mas batan-on ug mas gawasnon nga makapuli nako, kasamtangan kong nagpadayon sa pagduma sa akong mga tulumanon sa radyo ug telebisyon.
***
Tungod sa kontrobersiya, mas sayon nga kapilian ang hingpit nang pagpahuway aron nga makalingkawas sa di sayon nga inadlawng mga pakauwaw sa organisadong kampanya batok ni bisan kinsang giisip nga babag sa bisan unsay mahunahunaan sa nasudnong pamunoan.
Di sama kasayon apan maoy gipili sa tanang napug usa ka libo ka kawani sa ABS-CBN: Ang pagtuman sa among mga gimbuhaton kutob sa maabot sa daginuton namong katakos pag-alagad sa Pilipino nga, segun sa unang nagtikad ug nagpalambo sa ABS-CBN nga si Eugenio Lopez Jr., maoy bugtong kapuslanan sa among pagpanibya.