Kinakusgang pakgang sa COVID-19
Bisan kapila na bungol-bungoli sa mga tagduma sa Department of Health (DOH) sa Pilipinas ug mga tagduma sa kampanya batok sa COVID-19 sa ubang kanasuran, wa mohunong ang World Health Organization (WHO) nga ang lockdowns di garantiya nga makabadlong sa pagkatap sa sakit.
Sa iyang pagpanubag sa mga pangutana sa kalibotanong
media gikan sa headquarters sa WHO sa Geneva, Switzerland, niadtong Miyerkules, si Direktor Heneral Tedros Adhanom Ghebreyesus nisubli pagpasidaan nga ang pag-awhag sa katawhan pagpabilin sa ilang pinuy-anan di makabuntog sa epidemiya.
***
Gitambagan ni Dr. Tedros ang nagkalainlaing kanasuran nga ang lockdowns, nga gipamugos sa mga opisyal sa Pilipinas nga tawgon og enhanced community quarantine, gawas ni Presidente Rodrigo Duterte nga niangkon nga lockdown ang iyang gipahamtang sa tibuok Luzon, mao lay paagi sa pag-inat sa lugway sa di pa mosulbong ang mga kaso sa COVID-19.
Nanghinaot siya nga ang lockdowns angayng gamiton sa kanasuran sa paghimo og mas tukma nga mga lakang sa pagpangita sa mga masakiton sa di pa sila makapanakod sa ubang mga molupyo, sa ingon maluwas ang mas daghang kinabuhi.
***
Nirekomendar si Dr. Tedros og unom ka lakang nga angayng himuon dayon samtang gipatuman ang lockdowns:
•Una, pagpalapad, pagbansay-bansay ug pagpakatap sa health care workers;
•Ikaduha, pagpatuman og sistema nga matultolan ang matag gidudahang kaso sa community level;
•Ikatulo, pagpalambo sa produksiyon ug kapasidad sa COVID-19 testing;
•Ikaupat, pag-ila, pagtukod ug paghingpit sa kahimanan nga magamit sa pagtambal ug pagbuwag sa mga pasyente;
•Ikalima, pag-umol og klarong plano pagsubay ug pagbuwag sa close contacts nga mahimong natakdan; ug
•Ikaunom, pagpalihok sa tanang buhatan sa gobyerno sa pagkontrolar sa COVID-19.
***
Nipasalig si Dr. Tedros nga ang ilang mga rekomendasyon maoy labing epektibong paagi pagputol sa kutay sa tinakdanay, aron nga kon libkason nang lockdowns, di mosulbong pagbalik ang kagaw. Mas makadaot kon mangabli na sa mga negosyo ug mga eskuylahan, aron lang mapugos pagpanira pagbalik kay nikatap na sang mga kaso.
Gisubli sa makausa pa ni Dr. Tedros nga ang agresibong mga lakang pagpangita, pagbuwag, pag-testing, pagtambal ug pagsubay sa mga natakdan di lang maoy labing paspas nga paagi paglingkawas sa lockdowns, apan mao say labing maayong paagi paglikay nila.