Laing pataka sa herd immunity
Nasubo ko pagkahibawo nga si Regional Director Jaime Bernadas sa Department of Health (DOH) sa Central Visayas nagpadayon pagsangyaw og kasayuran nga sukwahi sa mga lagda sa ilang ulohang buhatan ug sa kalibotanong kahugpongan nga nagduma sa kampanya batok sa COVID-19.
Human sa iyang pagduso sa mass rapid testing sa Cebu City, Mandaue City, ug Lapu-Lapu City bisan sa pagdili sa DOH sa paggamit sa rapid test kits alang sa mass testing, nangangkon na sab si Bernadas nga hapit na makab-ot sa mga Sugbuanon ang herd immunity batok sa COVID-19.
***
Nahibawo na tang tanang unsay nahitabo sa rapid mass testing sa tulo ka dakbayan niadtong Mayo: Nag-usab-usab ang mga lagda sa pagpili sa mga boluntaryo ug dihang nagmingaw gipangsuburnohan og kinilong bugas humay ug gipakapinan og hudlat nga di makabalik sa trabaho kon di mangapil.
Gani, ang special adviser sa National Task Force sa COVID-19, Dr. Ted Herbosa, nibasol sa pagpakatap sa rapid test kits, nga mas daghang sayop kay sa sakto, nga apil sa nakapasulbong sa mga kaso sa Cebu City ug nahimong epicenter sa tibuok nasud. ***
Si Bernadas wa pa g’yud motagam. Bisan sa pasidaan sa World Health Organization (WHO) ug mga eksperto sa nagkalainlaing kanasuran nga way sukaranan sa siyensiya ang mga pangangkon sa herd immunity batok sa COVID-19, si Bernadas nangangkon nga hapit na ni maangkon sa mga Sugbuanon.
Ambot nganong way nakahunghong niya nga ang kalibotanong petisyon nga nag- awhag nga patakdan ang mga batan-on sa kagaw aron kapanalipdan ang mga hamtong nabisto nga naglakip sa pekeng mga pirma sa mga siyentipiko.
***
Sa di pa ka matental pagtuo ni Bernadas, niang pagpasabot sa mga tinuod nga makamao nganong di epektibo ang herd immunity isip panagang batok sa COVID-19:
• Ang matakdang mga batan-on makatakod ug mahimong makapatay sa hamtong nilang mga ginikanan ug mga apohan;
• Moawas ang mga tambalanan sa mga mataptan, mas maapiki ang gipangkapoy nang health workers ug mosangpot sa mas daghan pa g’yung mangamatay; ug
• Wa pay klaro unsa kataas ang lahutay sa immunity sa mga mataptan sa kagaw (sa kaso ni DILG Secretary Eduardo Año lima ra ka buwan ang gintang sa iyang una ug ikaduhang pagkasakit).