Central Visayas na say topnotcher
Tungod sa padayong pagsulbong sa tinakdanay sa Sugbo ug kasilinganan nga mga isla, nahibalik ang Central Visayas sa numero uno sa listahan sa Department of Health (DOH) sa mga rehiyon nga kinadaghanan og bag-o nga mga kaso sa COVID-19.
Ikaduha na lang ang Metro Manila, ikatulo ang Calabarzon (Region IV-A), ikaupat ang Davao (Region XI), ikalima ang Cordillera Autonomous Region (CAR), ikaunom ang Central Luzon (Region III), ikapito ang Eastern Visayas (Region VIII), ikawalo ang Ilocos (Region I), ikasiyam ang Northern Mindanao (Region X), ug ikanapu ang Western Visayas (Region VI).
Sa 284 ka bag-o nga kaso sa atong rehiyon nga nalista sa DOH hangtod niadtong Pebrero 3, Miyerkules, dul-an sa katunga (128 o 45%) ang gikan sa Dakbayan sa Sugbo.
75 (26.41%) ang gikan sa Lalawigan sa Sugbo; 40 (14.08%) ang gikan sa Dakbayan sa Lapu-Lapu; 19 (6.69%) ang gikan sa Dakbayan sa Mandaue; 16 (5.63%) ang gikan sa Dakbayan sa Dumaguete ug Negros Oriental; ug unom (2.11%) ang gikan sa Dakbayan sa Tagbilaran ug Lalawigan sa Bohol. Way bag-o nga kaso ang Lalawigan sa Siquijor.
Timaan nga nagpabilin nga kuwang ang swab testing ug lapad ang tinakdanay, nagpabilin nga taas ang positivity rate: 9.70% (284 ang nagpositibo sa 2,929 ka swab samples nga nahiling sa napu sa 13 ka molecular laboratories sa rehiyon.
Ang kinatas-an og positivity rate mao ang Perpetual Succor Hospital (PSH), upat sa napu (40%); ikaduha ang PCA sa Mactan-Cebu International Airport, 13 sa 72 (18.06%); ug ikatulo ang ARC Hospital, napu sa 59 (16.95%).
Ang kinaubsan og positivity rate mao gihapon ang Bohol kansang BCPCRL may lima nga nagpositibo sa 131 ka swab samples (3.82%); ikaduha ang Negros Oriental Provincial Hospital, pito sa 144 (4.86%); ug ikatulo ang Vicente Sotto Memorial Medical Center, 45 sa 867 (5.19%).
Ang Cebu TB Reference Laboratory maoy nakahiling sa kinadaghanan nga 1,239 ka swab samples (140 ang positibo o 11.30%). Way nahimo nga swab test o wa lang kataho sa DOH ang tulo ka laboratoryo: Philippine Red Cross, Gov. Celestino Gallares Memorial Hospital, ug BioPath AFRIMS.