Unsay gikahadlokan sa presidente

Kon nituo pa si Presidente Duterte sa iyang sulti nga way kapuslanan ang mga imbestigasyon sa Senado wa unta siya magtagad sa hearings sa Senate Blue Ribbon Committee sa mga transaksiyon sa Pharmally Pharmaceuticals Corp. uban sa Department of Budget and Management Procurement

Service ug Department of Health.

Pero labihan kadako sa atensiyon nga iyang gihatag sa salida sa mga senador nga kada atubang niya sa nasudnong telebisyon mas taas ang panahon nga iyang gigahin paginsulto sa mga senador kay sa pagpasabot unsay gihimo sa pamunoan batok sa pandemya.

Makapakugang ang kamasuk-anon sa presidente, wa na hinuoy nabag-ohan sa kabastos ug kasaag sa iyang sinultihan kay kapin na sa lima ka tuig ta niya nga gi-anad, nga nilaba nilang Senador Dick Gordon ug Senate Minority Leader Franklin Drilon nga maoy labing aktibo nga nisukitsukit sa iyang tinudlo nga mga opisyal ug higalang mga negosyante.

Duna ba siyay gikahadlokan nga mabisto sa imbestigasyon? Duna bay bahin sa mga transaksiyon nga makagusbat sa iyang administrasyon? Duna bay mga ebidensiya nga peligrong matsambahan sa mga senador nga makabisto sa kadunot sa iyang liderato?

Di sama kakusganon ang reaksiyon sa presidente sa nangagi nga mga imbestigasyon sa Senado sa seryusong mga pasangil batok sa iyang pamunoan ug bisan sa iyang pamilya.

Pananglitan, mas pinugngan ang iyang mga tubag sa pagsusi sa mga senador sa kalihokan sa Davao Death Squad ug sa pagkaapil sa ngan sa iyang anak nga si Kongresista Paolo Duterte sa Davao Group nga gipasanginlan sa P6.8 bilyones nga shabu smuggling sa Bureau of Customs.

Pero sakto tingaling presidente. Unsaon man tuod ang mahimo nilang Gordon ug kaubanan batok niya? Bisan gitagoan ang iyang SALN ug tinuod nga kahimtang sa panglawas nagpabiling taas ang iyang popularidad.

Unsa may nakapaulbo sa iyang kaspa ning higayona? Di ba lang kadawat nga si Gordon nga niabsuwelto niya sa nangaging mga pasangil karon nag-piyesta pag-apiki sa iyang mga sinaligan? Nahadlok bang mas paminawon na sa mga senador ang ilang gisalikway nga mga saksi sa karaang mga imbestigasyon nga silang Jojo Acierto, Edgar Matobato, ug Arthur Lascanas? Nalisang ba nga sunod sa mga senador mahigmata na sab ang katawhan?