Pangiyugpos sa mga krisis
Pebrero 24 pa nagsugod ang gubat sa Ukraine pero ang economic managers ni Presidente Rodrigo Duterte karon pang adlawa magtigom aron pagtuki unsaon pagsagang ang pagsulbong sa presyo sa lana nga gipaabot nga sundan sa pagburot sab sa presyo sa ubang mga palaliton. Ambot nagduda ba kaha unsay tinuod nga baruganan sa gobyerno: Kondenahon ba ang pag-atake sa Russia suma sa Department of Foreign Affairs (DFA), o neutral ba suma sa presidente? Pero ang wa pag-apura nitakdo sa naandan sa pamunoang Duterte nga igo rang magkarakara kon may nahitabo na.
* * *
Niaging tuig pa nagsugod og sulbong ang presyo sa lana, nga gisumpayan na lang sa napu ka sunudsunod nga semana sa uminto karong tuiga, pero karon pang adlawa, Lunes, magtagbo ang economic managers aron pagtuon unsay implikasyon ngadto sa nasudnong ekonomiya. Ambot wa ba lang dayon makatugkad sa kadako sa epekto sa pagpamahal sa lana, o nagmika ba lang sa ilang trabaho, pero ang economic managers igo rang nipaundayon sa naandan sa pamunoang Duterte: Unya na mokihol kon uwahi na ang tanan.
* * *
Kon makatsamba ang economic managers ang ubang ahensiya sab ang naghagok. Pananglitan nigahin na sila og ₱2.5 bilyones nga fuel subsidy sa mga drayber sa mga sakyanang pamasahero, aron kapugngan ang uminto sa plitehan, pero wa pa maapud-apod kay ang Department of Transportation (DOTr) wa magdali paghimo og mga lagda. Pero si Transportation Secretary Arthur Tugade, nga gipamugos nang Presidente Duterte nga ipabilin sa sunod nga administrasyon, igo lang nisunod sa taras sa iyang amo: Magpaabot nga mabiyaan sa panahon sa di pa motuman sa trabaho.
***
Si Presidente Duterte mismo sa niaging tuig pa nga giapura sa transport groups ug sa iyang mga tinudlo sa Department of Energy (DOE) sa pagsuspenso excise tax sa mga produkto sa lana aron di mapugos ang mga drayber pagpasaka sa plitehan, nga makapasamot sa kalisod sa mga pasahero. Pero hangtod karon nagdumili sa pagpatawag og special session aron mapanday ang mga senador ug mga kongresista, nga nagbakasyon para sa ilang kampanya sa piniliay sa Mayo 9, ang balaudnon nga mosuspenso sa excise tax. Igo lang nituman sa iyang kaugalingong lagda: Motrabaho lang kon ganahan.