Labing unang laslas sa 2022
Bisan di sama kadako sa pasiunang mga banabana, mahinayon ang laslas sa presyo sa lana karong semanaha. Nga maoy labing una karong tuiga. Human sa 11 ka sunudsunod nga semana nga sulbong sa presyo. Nga naglakip sa kinadak-ang mga uminto sa niaging duha ka semana tungod sa gikondenar nga pag-atake sa Russia sa Ukraine. Kapin sa ₱13 kada litro sa krudo ang banabana sa laslas human sa tulo ka adlaw nga pagtidlom sa presyo sa merkado sa kalibotan sa niaging semana. Pero nimahal ang lana sa nisunod nga duha ka adlaw.
Ang mosunod maoy bag-ong banabana sa mga eksperto sa industriya sa lana sa laslas sa presyo (di hinuon angayng mopalabi og tuo ang mga motorista kay posibleng mas ubos ang laslas nga aktuwal nga ipatuman sa mga kompaniya sa lana) nga mahimong sugdan na og patuman sa pipila ka gasoline stations karong adlawa: - Mobarato ang krudo og ₱11 ngadto sa ₱11.70 kada litro; - Mobarato ang gasoline og ₱6 ngadto sa ₱6.20 kada litro; ug - Mobarato ang kerosene og ₱8.70 ngadto sa ₱8.80 kada litro.
Dunay laing mga bentaha nga mapaabot ang mga drayber sa mga sakyanang pamasahero ug mga tag-iya sa pribadong mga sakyanan: - May mga kompaniya sa lana nga mahimong molaslas na sa ilang presyo sugod karon o ugmang adlawa, mas sayo kay sa naandan nga Martes, aron pagdani og mas daghang magpatubil; ug - May mga kompaniya sa lana nga motanyag og dagkong diskuwento sud sa pila ka adlaw sa panghinaot nga matultolan sa mas daghang motorista.
Ang laslas (nga, bisan sa gipasalig nga gawasnong kumpetinsiya sa mga kompaniya sa lana ubos sa oil deregulation law, garantisado nga magkapareha hangtod kataposang singko sentabos) ug posibleng mga diskuwento (nga gagmayng mga kompaniya ra ang motanyag, maong mahimo nga mabasiyo ang tangke sa imong sakyanan sa di pa matultolan ang nihit kaayo nilang mga estasyon) di hinuon makapapas sa kinatibukan nga uminto tungod sa way kinutoban nga mga patong kada semana sukad sa pagsugod sa 2022: - ₱30.65 kada litro sa krudo; - ₱20.35 kada litro sa gasolina; ug - ₱24.90 kada litro sa kerosene.