Di makopya sa mga trapo

Kon pausohay ang basehan sa eleksiyon, daog na silang Bise Presidente Leni Robredo ug Senador Kiko Pangilinan. Kay ang tanang gihimo sa ilang kampanya gikopya sa ilang mga kaatbang. Tungod ba kaha kay way kuwarta ni makinarya, ug kay mga batan-on ang mayoriya sa mga niboluntaryo, nahimong labihan kamamugnaon sa ilang kampanya. Wa g’yud untay katungod silang Leni ug Kiko nga pabilin pang magbarug hangtod karong semanaha. Kay giisnab sila sa labing dagkong politiko tungod sa ilang pagbatok sa mga dinastiya. Pero ang ilang kampanya nisamot hinuon kadasig ug kadako. Mga dumadapig nilang Leni ug Kiko ang nagsugod sa caravan sa Sugbo ug ubang bahin sa nasud. Sila ray nagsabot nga mag-abot sa mga simbahan o mga merkado para sa caravan sa labing dagkong kadalanan hangtod sa lagyo nga kalungsoran. Human sa pila ka adlaw, nisunod ang karibal nga kandidato pagka presidente. Ug aron malabwan ang gidaghanon sa mga sakyanan sa caravan nilang Leni ug Kiko, way kukauwaw nga gigamit ang mga sakyanan ug mga trabahante sa gobyerno. Kay sila may nagtungkawo sa gahom, wa mangahas pagbadlong ang Comelec. Ang kasadya ug kadagko sa rallies nilang Leni ug Kiko nagsugod sa Cebu City niadtong Pebrero 24. Gipalabwan dayon sa ubang mga probinsiya ug mga syudad sa Kabisay-an, Mindanao, ug Luzon. Nga nipasundayag sa talagsaon nilang mga kultura ug tradisyon. Napugos pagkopya ang karibal. Pinaagi sa pagpabaha sa kuwarta, libreng pagkaon ug raffles sa groceries. Pero nisamot kadaghan ang boluntaryong nanambong sa rallies nilang Leni ug Kiko. Lisod ambasan kon kuwarta ray saligan. Dayon gilusad sa mga dumadapig nilang Leni ug Kiko ang house-to-house ug pulung-pulong sa kabarangayan. Ning kataposang mga adlaw sa kampanya, mas nidaghan ang mga boluntaryo nga nanuktok sa kabalayan ug nangimbitar sa mga tapok aron pagpakigsulti sa ilang mga silingan. Maglisod na og kopya ang uban. Di mahimong mag-house-to-house ug mag-pulung-ulong ang ilang trolls. Nawani ang ilang ka-dominante sa social media, nga kapin sa duha ka dekada na nilang gigawongan. Bisan pa og manuburno ug mopakatap sa labing gikaintapan nilang mga tigpamaba, malupig sa kampanya sa kamatuoran. Sa Mayo 9, ang kuwarta ug makinarya mapukan sa puwersa sa nahigmata nang katawhan.