Mga pulungpulong liwas sa eleksiyon
Sa di pa ka mahinayak og tuo sa mga huhungihong nga nangaluya nang mga boluntaryo nilang Bise Presidente Leni Robredo ug Senador Kiko Pangilinan sa kataposang mga adlaw sa kampanya, mangahas ko og pahibawo nimo nga upat ka pulungpulong para nilang Leni ug Kiko ang akong natambongan niadtong Huwebes.
Mas daghang pulungpulong ug house-to-house campaigns ang gipasiugdahan sa ubang mga boluntaryo, di lang sa Sugbo kon dili sa tibuok nasud ug ubang kanasuran, isip kataposan ug hiningusgan nga hunat sa pakigsulti sa mas daghang botante dayong piniliay karong Mayo 9. Kinadak-an sa among mga pulungpulong ang napahigayon niadtong Huwebes sa gabii sa gym sa Basak, Lapu-Lapu City. Ang kapin sa 500 nga madasigong nanambong timaan sa talagsaong liderato ni Barangay Kapitan Belong Darnayla. Kinsa isog nga nangampanya para ni VP Leni di lang sa Basak kon dili sa uban pang mga barangay.
Mas daghan pa ang gipaabot nga manambong gabii, sa ikaduhang sunudsunod namong pulungpulong sa samang Basak gym, nga gitakdang maglakip sa mga molupyo sa kasilinganang mga barangay, kansang mga kapitan nakumbinser sab ni Darnayla parang VP Leni.
***
Pero aron makaabot sa nagsunudsunod nga kalihokan niadtong Huwebes, ug aron pagsungasong sa huot nga trapiko sa hapon ug sayong gabii sa Consolacion, Mandaue City, ug Lapu-Lapu City, kinahanglan ko nga mosakay og habal-habal. Di lang kausa kon dili kaduha.
Una, aron makapauli sa amo sa Consolacion gikan sa pulungpulong sa usa ka inilang kompaniya sa Mandaue sa Huwebes sa hapon. Ug ikaduha, aron makaabot sa medical mission sa Marigondon, Lapu-Lapu City, usa ka oras sa wa pang pulungpulong sa Basak.
***
Samtang nag-uwan sa among paglusutlusot sa higanteng mga sakyanan sa Butuanon Bridge hangtod sa unang taytayan sa Mandaue ug Mactan, nangutana ang drayber sa habal-habal kinsa ang angayng pilion sa mga nanagan sa Consolacion ug sa nasud.
Human nako istoryahi sa akong mga nahibaw-an, iyang gisumpayan sa mas daghang nahibaw-an gikan sa direktang pagpaniid sa mga kampanya nga nalabyan sa iyang pamasahero. Bisan unsay resulta sa eleksiyon karong Lunes, nakadaog na ang katawhan: Ang nasugdang panagsulti ug pagsinabtanay magpadayon human sa piniliay; kay ang katawhan nga nahigmata na, lisod pakatulgon pagbalik.