The Freeman

Sa pagkaalim sa mga kahiubos

-

Liwas sa piniliay sa Mayo 9, gibahaan ko og mga mensahe gikan sa mga boluntaryo para nilang Bise Presidente Leni Robredo ug Senador Kiko Pangilinan nga nipadayag og kakugang, kaguol, kahiubos, kasuko, ug pagtuo nga gitikas ang iskutenyo. Dayon nisunod ang lista sa mga kompaniya nga boykoton kay nidapig sa pikas ug mga kompaniya nga palitan kay nisuporta nilang Leni ug Kiko. Nideklarar sab nga di na sila motabang sa mga kabos ug mga biktima sa katalagman. O kon motabang man, pilion ra ang Kakampinks (way detalye unsaon sa pag-ila). ***

Wa ko motubag sa mga mensahe. Wa mangahas pagpakalma nila nga maghuwat una og mga ebidensiya una mamasangil og lapad nga tikas. Labi na nga ang pipila nga niawhag nga moangkon sa ilang kapildehan silang Leni ug Kiko gitabangan og away sa mga di pa kadawat. Pero nakapangut­ana sab sa akong kaugalingo­n angay bang mopadayon pagtabang sa mas nagkinahan­glan? Nga sila ra man say nagduot sa ilang kaugalingo­n pinaagi sa pagpapalit sa kurakot nga mga politiko? Sa pikas nga bahin, unsa man say kaayuhan kon mobalik ko og pangiyugpo­s?

*** Natubag ang akong mga pangutana sa niaging buntag. Dihang ang tig-atiman sa among koi pond, nga niuli sa Leyte tingali tungod sa eleksiyon, sayo nga niduaw sa among bay. Gihatagan mi niya og dakong putos sa kinhason. Gilamian kaayo mi sa akong asawa sa kinhason. Nga sa pagkahurot na mi nakahinumd­om nga ang naghatod wa diay mangayo og bayad. Ni bisan unsang bugti sa sinugatan sa iyang biyahe.

Mas napatin-aw ang akong kalibog pagka sunod adlaw. Dihang gihatod sa among kaubanan (nga mga kawani ug kanhi kawani sa ABS-CBN) sa Kapamilya Community Pantry ang sinako nga bugas ngadto sa among napilian nga parokya. Uwahi na ming nahibawo nga ang kura paruko nikumparar ni Ferdinand Marcos Jr. nga morang bag-ong Hesukristo kay wa g’yud mosumbalik sa mga pasangil batok niya. Di sayon ang radikal nga pagmahal. Pero nakumbinse­r ko nga, sa pagligid sa mga adlaw ug sa pagkaalim sa mga kahiubos, mapatuman ang hangyo ni Robredo sa iyang paglusad sa Angat Buhay NGO nga way pilion sa pagtabang ug way bisan usa nga talikdan.

 ?? ??

Newspapers in English

Newspapers from Philippines