Pagbugto sa inhustisya
Ang kalang-og sa eskandalo sa pagbaha sa kuwarta pagpamalit og mga boto sa piniliay sa Mayo 9 kalabwan lang sa mas mangalisbong mga transaksiyon pagbawi sa dakong gasto sa eleksiyon inig lingkod sa mga nidaog sa udtong tutok karong Hunyo 30. Samang inutil ang Comelec ug kapolisan pagbadlong ug pagpapriso sa mga namalit og boto, wa say mahimong mga magbubuhis ug demokratikanhon untang mga institusyon pagbaraw sa pagkawat sa atong panudlanan pagtumpi og mas dakong puntil para sa personal nga mga kapritso ug pagpamalit na sab sa sunod nga piniliay.
Magpatuyang na lang unya sila og palusot og kuwestiyonableng mga proyekto. Nga makapaburot sa pribado nilang mga bolsa ug mopasamot sa kalisod sa katawhan. Mga istrukturang di kapuslan sa kinabagan. Kay mas dako ang komisyon sa mga politiko ug mga kontraktor. Maong ampaw na lay madapat sa proyekto. Way makababag sa ilang pangurakot. Kay ila man ang kinabag-an sa mga konsehal ug board members. Bisan may mangahas pa og kiha, tinudlo sa ilang mga padrino ang mga tagduma sa Commission on Audit, Bureau of Internal Revenue, mga huwes, ug Ombudsman.
Mapasagdan bisan ang labing batakang mga panginahanglan. Pabiling iwit ang kalidad sa edukasyon, padayong di matambalan ang mga masakiton, mosamot pagburot ang minilyon ka pamilya nga kahikawan sa disenteng mga pinuy-anan ug mas bug-at ang pag-antos sa kagamay sa suholan ug kakuwang sa trabaho ug panginabuhi. Way interes ang mga politiko sa pagpalambo sa kahimtang sa katawhan. Kay ang edukado, himsog, ug may igong kinitaan nga mga botante mahimong di na nila mailad, mapalit, ug mahudlat.
Human sa piniliay niadtong Lunes, mas nilig-on ang 250 ka politikanhong mga dinastiya nga nagkontrolar sa kapin sa 110 milyones ka Pilipinhon. Sa ato pa, usa ra ka pamilya ang nagbuot sa kalisod o kaharuhay sa kinabuhi sa tunga sa milyon ka mga molupyo. Dunay mangahas sa paghagit sa mga gamhanan ug pagpukaw sa kinabag-an. Pero maila ang labing bangis nga pagpanggukod. Maayo na lang nga ang atong kasaysayan puno sa mga bayani nga niula sa ilang dugo ug nibuhis sa ilang kinabuhi. Aron lang mapugwat ang katawhan sa higanteng inhustisya. Aron mao nay mangunay pagbugto sa ilang kadena.