Mandato sa pagpapating
Bisan kinsay itudlo ni Presumptive President Ferdinand Marcos Jr. nga komisyonado sa Bureau of Internal Revenue (BIR) dunay dakong problema: Unsaon pagpaningil ang ₱203.8 bilyones nga utang sa estate tax nilang Marcos Jr. ug sa iyang inahan nga si Imelda ug mga igsuon nga silang Senador Imee ug Irene? Ubos sa balaod, ang utang sa estate tax kinahanglang paninglon kada lima ka tuig. Nga gihimo sa nangaging mga administrasyon sukad sa pagkamatay ni Ferdinand Marcos Sr. sa 1989. Makapangisog bang bag-ong liderato sa BIR nga pabayron ang nagtudlo nila?
Di buang si Marcos Jr. nga mosugo sa BIR pagpaningil sa ilang utang. Nga niburot gikan sa orihinal nga ₱23.2 bilyones sa 1989 tungod sa patong nga tinuig nga mga interes ug multa. Kon nagpapating si Marcos Jr. sa niaging 33 ka tuig nga di pa siya maoy nagtungkawo sa Malakanyang, unsa na kaha inig banos niya sa labing taas nga katungdanan sa nasud? Kon di makakolekta ang BIR sa utang sa mga Marcos, unsaon man nila pagkumbinser ang uban nga mga magbubuhis sa pagbayad sa ilang obligasyon? Laing ahensiya sa gobyerno nga hanap og kaugmaon sa bag-ong administrasyon mao ang Presidential Commission on Good Government (PCGG). Nga gitukod ni anhing Presidente Cory Aquino aron pagpangita ug pagsakmit sa kinawat nga katigayonan sa mga Marcos ug ilang cronies. Bisan sa pasalig ni Marcos Jr. nga iyang ipabilin ug palapdan ang PCGG, aron maka-imbestigar sa kinawat nga katigayonan sa ubang administrasyon, bakikaw kon papadayunon ang ahensiya sa pagsubay sa mga kinawat sa nagtudlo sa ilang kadagkoan.
Pasiunang timaan sa kainutil sa PCGG: Wa nay ek sa ebidensiya sa pangawat nga mga Marcos ra sab ang nipakita, ang mga letrato ni Senador Imee sa social media sa mahalon nga paintings sa pinuy-anan ni Imelda nga dugay rang gipangita sa sheriff sa Sandiganbayan. Naluya nang daan ang PCGG sa niaging unom ka tuig. Tungod sa kasuod ni Presidente Duterte sa mga Marcos. Mosamot kamapanagan-on kon si Marcos Jr. nay ilang amo. Daghang salamat sa eleksiyon sa Mayo 9, mosamot kapating ang mga Marcos nga di na paninglon sa ilang kawat ug pagpangyatak sa balaod.