Paglaom og tarung nga eleksiyon
Napahinumdoman ta unsa kadako sa ilang gahom dihang ang bag-ong natudlo nga si Komisyonado Rey Bulay nipasidaan nga ipadakop sa kasundalohan si bisan kinsang manaway sa Comelec. Kay ang Armed Forces of the Philippines (AFP) ug ang tibuok burukrasya ubos sa ilang pagduma atol sa election period. Nanghudlat man o wa, kasundalohan ug di kapolisan ang gihisgotan ni Bulay kay nagtuo tingali nga mas kahadlokan, o mas kasaligan nga makadakop sa mga mangahas. Ug samtang di krimen ang pagpanaway sa Comelec, daghan uyamot ang mga lagda nga mahimo nilang mapahamtang.
* * * Maong makapasubo nga bisan sa kadako sa ilang gahom ug sa kadaghan sa mga lagda, nagpabiling inutil ang Comelec batok sa vote buying ug ubang kalapasan nga bantang nga gihimo ug gikabalak-an nga maoy tinuod nga nagbuot sa resulta sa mga eleksiyon. Karong tuiga, nagtukod sila og Task Force Kontra Bigay. Aron ingnon nga seryuso, giapil gawas sa kapolisan ug kasundalohan ang Anti-Money Laundering Council ug ang Bangko Sentral ng Pilipinas. Imbes mabaraw, nasaksihan sa piniliay sa Mayo 9 ang gihulagway nga labing lapad nga pinalitay sa mga boto.
* * * Kay sama sa nangaging mga eleksiyon, ang Comelec kutob ra sa mga pasidaan. Nagtuo tingali nga pinaagi sa pagbalikbalik og pahinumdom sa mga lagda ug mga silot, tugkan og kahadlok ang mga politiko. Pero wa igdungog ang mga politiko sa kamasugtanon sa mga lagda. Ni sa kahadlok ug kaikog. Gipahimuslan ang naandang pangiyugpos sa Comelec aron pagpamintaha sa ilang mga kaatbang nga way kuwarta ug makinarya. Kumbinsido nga sama sa nangaging mga eleksiyon way magtagad pagsilot nila.
* * * Sama sa liwas sa nangaging mga eleksiyon, nipasidaan ang Comelec sa niaging semana nga seryusuhon nila pag-imbestigar ang kalapasan inigkahuman sa iskutenyo ug proklamasyon. Pero nahibawo na tang way maapiki sa vote buying, iligal nga campaign materials ug pinataka nga Statement of Contribution and Expenditures (SOCE). Kon isip nasud ug katawhan wa lang gihapon tay himuon ug maglaom nga matarung ang umaabot nga mga eleksiyon, wa tay kalainan sa tawo nga nagbalikbalik paghimo og usa ka butang ug nagpaabot og lahi nga resulta. Nga, kon nakalimot na ka, gihulagway sa makinaadmanon nga si Albert Einstein nga pagpakabuang.