Katihik ug gugma pagsibya
Pagsugod namo sa SibyaTV human gipawong ang ABS-CBN Cebu duha ka tuig nang nilabay, pataka lang mi og subscribe sa mga plataporma nga makatabang namo sa pagpadayon sa pagsibya: Nibayad mi sa Zoom, nga maoy labing sayon ug popular niadtong higayona, ug nibayad pa g’yud mi sa Restream aron makasibya mi sa YouTube ug Facebook sa samang higayon. Uwahi nang nahibaw-an nga wa kinahanglana ang Zoom kay mas mapuslanon ang Restream. Sa niaging semana ra sab nako nahibaw-an nga wa gani diay kinahanglana nga mobayad pa mi sa Restream. *** Basola ang akong katihik. Napugos ko og pangita og mas baratong alternatibo dihang giputol sa Restream ang among sibya sa niaging semana bisan usa ka buwan pang nahibilin sa among subscription. Pinaagi sa popular ug libreng application nga OBS (Open Broadcaster Software), makasibya mi sa YouTube ug Facebook. Libre pero di dungan. Daghang salamat sa usa namo ka viewer nga tinuod nga kamao sa teknolohiya nga nigiya nako pagtaod sa Multiple RTMP plugin sa OBS. Karon dungan nang akong livestreaming sa duha ka social media platforms nga way bayad.
***
Wa ko kahibawo hangtod kanus-a nga magsilbi ang akong katihik. Libre ang YouTube kay nagtumpi man ang ilang kita gikan sa advertisements. Libre ang OBS ug Multiple RTMP kay nagkahiusa ang mga mahigugmaon sa teknolohiya sa pakigsawo sa ilang plataporma ngadto sa mas daghan. Nilahutay ang mga magsisibya sa libreng mga plataporma kay duna silay bahin sa ads nga isal-ot sa ilang mga programa. May mga kompaniya hinuon sama sa Restream nga nangita og buslot nga matapakan. Bugti sa bayad.
***
Gugma sa pagsibya ang nakapugong nako sa pagtikad sa ubang kahinguhaan. Nagdako lang ang akong hunahuna nga mosuway og panguma. O pagnegosyo. Pero wa pa g’yud kong kakita og rason o kahigayonan sa pagbuntog sa labing dakong babag: Ang kahadlok sa pagsugod. Nisaad sa akong kaugalingon nga magsibya hangtod nga mahimo pa. Ug nga gamiton ang tanang katakos sa pagpasabot sa matag programa. Pero ako sab ang labing unang mohukom sa paghunong. Kon magkanguhal na. O kon magbalikbalik na lang ang istorya. O kon wa nay bag-ong sugilanon o kasinatian nga mapakisaw-an.