Mga pangutanang nangilaba og tubag
Sa sunod higayon nga makigtagbo si Presidente Ferdinand Marcos Jr. sa langyawng mga negosyante nga iyang imbitahon pagbubo sa ilang puhonan aron makamugna og dugang trabaho ug makapalambo sa nasudnong ekonomiya sa Pilipinas, unsa man siya kaandam pagtubag sa ilang mga pangutana?
Si bisan kinsang tarung nga negosyante mangutana g’yud
sa mga detalye sa pasalig nga ang Pilipinas ang labing haom nga destinasyon sa ilang mga negosyo. Mahimong tinuod ang sulti sa atong katiguwangan nga ang kuwarta maoy labing talawan. Maong tinuod sab nga ang mga negosyante maoy labing segurista.
***
Bisan kon sininaan sa labing diplomatikanhon nga mga pulong, unsaon pagtubag ni Marcos ang mga pangutana nga gitumong pagsukod sa kaluwas sa langyawng kuwarta dinhi sa ato:
• Mas molambo ang mga negosyo kon managsama ang kahigayonan sa merkado, unsa may garantiya sa makiangayong kumpetinsiya kon atbangan sa mga negosyante nga dako og amot sa imong kampanya ug dagko og puwesto sa administrasyon?;
• May lokal nga mga negosyo sa Pilipinas nga wa hatagi og prangkisa bisan nakatuman sa tanang panginahanglan sa mga ahensiya sa gobyerno tungod lang kay gigukod sa mga politiko, unsa may dag-anan sa langyawng mga negosyante kon simbako initan sa mga nagtungkawo sa gahom?;
***
• May lokal nga mga negosyo nga gihulga sa labing gamhanang mga opisyal sa gobyerno nga seradoan pero nakapadayon human gibaligya ngadto sa mga negosyanteng suod sa administrasyon, unsa may panagang sa langyawng mga negosyo nga simbako maibgan sa imong mga alyado?;
• Daghang salamat sa imong pasalig sa United Nations nga imong panalipdan ug palambuon ang tawhanong katungod, pero nganong sayon ra mang gipasanginlan nga mga terorista ug gipamatay ang mga indibiduwal nga lehitimong nagprotesta sa kuwestiyonableng mga lagda ug programa sa administrasyon?;
***
• Daghang salamat sa imong pagbalikbalik og pasalig sa imong mga diskurso sa mga nasud nga giduaw sa imong determinasyon pagpatigbabaw sa rule og law, pero nganong wa man magukod ang mga polis ug mga opisyal sa gobyerno nga responsable sa laktod nga pinatyanay sa kapin sa 30,000 ka mga biktima sa kampanya batok sa ilegal nga drugas?; ug kataposan na lang g’yud
• Nganong pulos ra tambasakan ug way iho nga napriso sa kampanya sa pangurakot sa gobyerno?