Bisan di masakit, likayan ang ASF
Ang maayong balita mao nga di ta matakdan sa African Swine Fever (ASF) nga naghasol sa industriya sa baboy sa Pilipinas ug ubang kanasuran sa daghang katuigan. Nipasalig ang mga eksperto nga bisan mangaon og karneng baboy nga dunay ASF, di ta mangasakit. Way laing matakdan ang kagaw sa ASF gawas sa mga baboy. Di siya makatakod sa laing mga hayop. Eksklusibo rang sakit nga iyang mahatag, nga kasagaran moresulta sa kamatayon, ngadto sa mga baboy. Gikontrolar ang pagkatap sa ASF di para nato kon dili aron pagpanalipod sa mga baboy.
Ang daotang balita mao nga ang kagaw sa ASF mao ang usa sa labing taas og lahutay. Nga bisan patay na ang baboy magpabilin siyang buhi sa karne. Mapreserbar siya uban sa karne sud sa daghang katuigan.
Talagsaon ang abilidad sa kagaw sa pagkatap. Mahimo siyang motakod sa baboy nga gipakaon og lamaw nga nasagolan og karneng may ASF. Mahimong motabok sa baboy gikan sa hugaw sa ubang hayop nga nakakaon sa karneng may ASF. O sa mga sangkap sa pagihaw. O sa mga butas ug mga sinina sa mga trabahante sa baboyan.
Mao ni hinungdan nga wa pang kalingkawas ang Pilipinas gikan sa ASF. Human unang natakdan ang mga baboy sa Rizal niadtong 2019. Usa ka tuig sa wa pang pandemya sa Covid-19. Nikalma nang tinakdanay sa Covid-19 pero wa pa molunga ang ASF.
Bisan sa kahigpit sa mga lagda batok sa pagkatap sa kagaw nga gipatuman sa Department of Agriculture, nagpadayon ang problema. Nga bisan ang Sugbo, nga luwas unta sa ASF sa niaging upat ka tuig, wa makalingkawas.
Mao ni rason nga bisan di ta mangasakit, molikay ta kutob sa mahimo sa pagkaon sa mga karneng baboy nga natakdan sa ASF. Kay motabang lang ta sa pagpakatap sa kagaw. Bugtong paagi nga mamatay ang kagaw mao ang pagdoble sa temperatura sa naandang pagluto. Di tanang kusina dunay pressure cooker ug di tanang pamilya dunay pailob sa espesyal nga pagluto.
Di sab tanang pagkaon matilok. Bisan usa lang ka hiwa sa karneng may ASF ang mahibilin, mahimong masagol sa lamaw o malabay sa basurahan ug makatakod og dugang mga baboy.