Pulos tigpakaaron ingnon

Kon si Finance Secretary Benjamin Diokno ang tuohan, si Presidente Ferdinand Marcos Jr. ang kinaisogan. Mas isog pa siya ni kanhi presidente Rodrigo Duterte. Ug sa ubang nangagi nga mga presidente. Kay andam siyang mohunong sa abundang pension sa military ug uniformed personnel (MUP).

Para sang Diokno, si Marcos ang kina-braytan. Mas utokan kay ni anhing presidente Noynoy Aquino, kanhi presidente Gloria Macapagal Arroyo ug ubang nangaging presidente. Kay siya ray nakatugkad sa peligrong pagka bangkarota sa nasudnong panudlanan. Kon paundayonan ang nasobrahan ra kabuhong nga pension sa kasundalohan ug kapolisan.

* * *

Pero ang ulug-ulog ni Diokno gisukwahi ni Defense Secretary Carlito Galvez. Sa iyang pagatubang sa mga senador nga nagtuki sa balaudnon. Nga modason sa awhag ni Diokno pag-usab sa pension system sa MUP. Matod ni Galvez nabalaka si Marcos sa hudlat sa 70% sa aktibong mga sakop sa Armed Forces of the Philippines (AFP). Nga mosayo og retiro sa katungdanan. Kon ipamugos ang mga rekomendasyon ni Diokno.

Kon pulos sila nagsulti sa tinuod, wa diay klaro si Marcos. Niyango sa sugyot ni Diokno. Pero nikakak sa pasidaan ni Galvez.

* * *

Di tang kapaabot nga si Marcos mangunay pagpasabot sa iyang baruganan. Kay ang estilo sa iyang liderato, o kakuwang ini, sa niaging siyam ka buwan mao ang pagtago ug pagpakahilom kon dunay kontrobersiya. Nga maoy iyang gihimo sa eskandalo sa asukar ug sa pasangil nga apil ang iyang bayaw sa grabeng smuggling sa mga produkto sa agrikultura.

Mahimong gidasig niya si Diokno pag-usab sa pension system. Mahimong uyon sab siyang Galvez nga radikal ra ang kausaban ni Diokno. Kutob ra sa tag-an tag-an kay tagulilong ang liderato.

* * *

Di katabang sa paghupo ni Marcos ang pulog pagpaka aron ingnon sa duha niya magtatambag:

• Si Diokno naalarma kunohay sa MUP pero maoy nitabang pagpalusot sa binuang ni Duterte nga pagdoble sa suholan sa mga polis ug mga sundawo (nga nidoble sab sa pension sa mga retirado) niadtong 2018; ug

• Si Galvez naglantaw kunohay sa nasudnong interes pero maapil og kabusdik kon magpadayon ang binuang nga MUP pension system --moburot ang pension sama sa suweldo sa mga aktibo sa serbisyo, nga way bisan usa ka dako nga amot.