Taphawng mga silot sa wang-wang
Sa mga nangreklamo batok sa mga mayor. Nga nibalik og gamit og wang-wang aron paglusot sa trapiko. Niang lagda kinsa ray makagamit og sirens ug blinkers sa mga sakyanan:
Presidential Decree (PD) 96 ni anhing Presidente Ferdinand Marcos Sr. niadtong Enero 13, 1973. Nga nagtugot sa mga sakyanan sa Armed Forces of the Philippines (AFP), National Bureau of Investigation (NBI), kapolisan (karon ang Philippine National Police), fire department (karon ang Bureau of Fire Protection), mga ambulansiya sa mga ospital, ug Land Transportation Commission (karon ang Land Transportation Office).
***
Ang PD 96 nisugo sa LTC (karon LTO) pag-umol sa mga lagda pagpatuman sa balaod. Maong giluwatan ang LTC Administrative Order No. 1 Series of 1973 nga nidugang sa orihinal nga lista sa mosunod nga mga sakyanan: Law enforcement motor vehicles (bisan unsang sakyanan nga gamiton pagbadlong sa krimen), tower service cars, ug wreckers.
Niadtong Hulyo 23, 1998, ang LTO niluwat og memorandum nga naglista sa mga opisyal sa gobyerno nga makagamit og sirens ug blinkers sa ilang mga sakyanan: presidente, bise presidente, presidente sa Senado, speaker sa House of Representatives, ug chief justice sa Korte Suprema.
Mao ra. Wa maapil sa lista ang mga gobernador, mga mayor sa mga lungsod ug mga syudad, mga kongresista ug mga senador, mga barangay kapitan, ug ubang mga opisyal sa nasudnon ug lokal nga gobyerno.
Posible rang lusot sa mga politiko mao nga nagwang-wang ang ilang sakyanan kay nitabang sila sa pagsulbad og krimen o pagdakop og mga kriminal. Mas lisod paglusot ang pag-wang-wang aron mag-TikTok sa unahan.
Ang daotang balita mao nga wa mapatuman ang mga lagda batok sa wang-wang atol sa administrasyon ni kanhi presidente Rodrigo Duterte ug sa administrasyon karon ni Presidente Ferdinand Marcos Jr. Pero bisan ipatuman pa, magkatawa rang mga dinakpan sa kataphaw sa mga silot sa ilegal nga pagamit sa wangwang ubos sa Joint Administrative Order No. 2014-01 niadtong Hunyo 2, 2014 nga giluwatan sa Department of Transportation and Communication (karon Department of Transportation), Land Transportation Franchising and Regulatory Board (LTFRB), ug LTO:
• Multa nga ₱5,000;
• Pagsakmit sa sirens ug blinkers; ug
• Demerit point batok sa lisensiya sa drayber.