Kultura sa lakwatsa
Natinuod ang atong gikahadlokan. Nga ang kultura sa lakwatsa nga gipaslugdahan sa administrasyon ni Presidente Ferdinand Marcos Jr. sundon sa ubang mga opisyal sa gobyerno. Ang kapin na sa 10 ka biyahe sa ubang kanasuransa presidente ug sa dagkong delegasyon sa unang siyam pa lang ka buwan niya sa Malacañang gikabalak-an nga magsugod og bag-ong epidemiya sa nasud.
Tuod man, nagbaha ang mga reklamo batok sa mga politiko sa Sugbo ug kasilinganang mga isla. Nagpanon sa nagkalainlainnga paboritong mga suroyanan. Sa bisan unsa na lang nga katuyoan.
Sama sa mga laag sa presidente, ang mga magbubuhis maoy gipatakilid sa dagkong gasto sa kuwestiyonableng mga biyahe sa iyang mga alyado: • Dunay delegasyon sa mga barangay kapitan nga gipangulohan sa gobernador ug mga mayor sabtong silingang probinsiya nga nangadto sa Boracay aron pagpasidungog sa mga kapitan nga manamilit na sa ilang mga puwesto dayong eleksiyon sa barangay ug Sangguniang Kabataan karong Oktubre; ug • Dunay delegasyon sa mga kongresista nga nangadto para sa wa i-detalye nga official business (gidudahan sab silang nagplano paglusad og kudeta sa liderato sa House).
Pero way makalupig ning junket nga among nahibawan karong bag-o. Kongresista sa Sugbo nidala sa tanang
mayor sa iyang distrito sa Uropa para sa 19 ka adlaw nga suroysuroy. Mas nidako ang ilang delegasyon kay gipakuyog ang ilang mga asawa. Ang bisan unsang palusot nga mapuslanon para sa mga molupyo sa distrito ang ilang pag-adto sa Uropa nabuko na sa mga letrato nga gi-post sa pila ka sakop sa delegasyon. Nga nipakita sa ilang shopping sa labing mahalong brands sa sinina, bag, ug sapatos.
Kinsa may nigasto sa ilang biyahe? Nikuot ba sa ilang kaugalingong mga bolsa para sa ayroplano, hotels, pagkaon, inom, shopping ug ubang gastohan? O nakakita sila og paagi nga ang Sugbuanong mga magbubuhis maoy pabayron sa ilang bagdoy-bagdoy? Posibleng tubag sa mga pangutana sa ibabaw: Kuyog nila ang inilang kontraktor sa Sugbo. Kansang ATM gikatahong maoy gipaslak sa tanang gastohan. Unsay bugti sa kamanggihatagon sa kontraktor? Masipong ba niyang kinadak-ang mga proyekto sa distrito? Unsay may makapugong sa kontraktor pagsagol og ampaw sa mga proyekto aron mabawi ang iyang danyos sa Uropa?