Tikasan sa buhis
172 ka adlaw. O dul-an sa unom ka buwan. O dul-an sa 25 ka semana. Mao nay gidaghanon sa mga adlaw nga gipa-ihap ni Presidente Ferdinand Marcos Jr.:
• Sukad sa iyang pasidaan nga inihap na lang ang mga adlaw sa smugglers atol sa ikaduha niyang State of the Nation Address niadtong Hulyo 24, 2023;
• Hangtod sa sunod niyang hisgot sa smuggling, sa pagsugo sa bag-on niyang gitudlo nga Finance secretary sa pagpangulo sa kampanya batok sa smuggling, atol sa pagpanumpa ni Ralph Recto sa Malacañang niadtong Biyernes, Enero 12.
***
Nahibawo tang tanan unsay wa mahitabo sa 172 ka adlaw. Way bisan usa ka smuggler nga nadakpan, nakasohan, ni nasilotan sa iyang administrasyon. Way bisan usa ka cartel nga nabungkag, wa gani bisan usa ka sakop nga nanganlan, nakiha, ug nasilotan. Nahibawo tang tanan unsay padayon nga nahitabo sa 172 ka adlaw. Nisamot ang smuggling sa mga produkto sa agrikultura. Padayon nga gimaniobra ang suplay ug presyo. Nagpadayon ang artipisyal nga kanihit aron pagpaburot sa ginansiya. Nisamot ang kalisod sa katawhan sa pagpalit sa inadlaw nila nga mga panginahanglan.
***
Di ba lang magtagad sa pagpasabot si Marcos Jr. sa kapakyas pagtuman sa iyang pasidaan? Di ba lang motubag sa pagduda, nga mas nisibaw sa 172 ka adlaw, nga labing suod sa iyang administrasyon ang smugglers ug cartels nga padayong nisabotahe sa nasudnong ekonomiya?
Hangtod kanus-a pa man tang mag-ihap sa malipayong mga adlaw sa cartels ug smugglers? O angay tang magsugod og bag-ong ihap human niya gipasa ang responsibilidad ngadto ni Recto?
***
Wa uroy pangilogi ang anak sa diktador. Aron tingali pagtabon sa iyang kapakyasan, gipakapinan niya sa pagsugo si Recto sa paggukod sa mga tikasan sa buhis. Iya bang gihatagan si Recto og permiso sa pagpaningil sa iyang kaugalingong pamilya? Kay ang mga Marcos maoy labing dako og utang sa estate tax: ₱203.8 bilyones sa kataposang demand letter sa Bureau of Internal Revenue (BIR) niadtong Disyembre 2021. Kon may kaisog si Recto sa pagpaningil (kay ang BIR ubos man niya) ug kon modugo ang mga Marcos, dako og ikatabang sa pagkolekta og ₱4.3 trilyones nga buhis karong tuiga.