Bugalbugal sa Konstitusyon
Hangtod sa 2018, ang Lapu-Lapu City nanghangyo sa Malacañang kada tuig nga ideklarar nga holiday sa syudad ang Abril 27 sa pagsaulog sa kadaogan ni Lapulapu batok ni Ferdinand Magellan sa 1521.
Sugod sa 2019, ang Abril 27 nahimong special working holiday sa tibuok Pilipinas ug special nonworking holiday sa Lapu-Lapu City pinaagi sa Republic Act No. 11040 nga napasar sa Hunyo 29, 2018. Ang balaod, bisan mga Oponganon ray way trabaho, di unta mapatuman kon wa pa aprobahi, sa buwag nga botasyon, sa House of Representatives ug sa Senado.
***
Hangtod sa 2018, gitiman-an sa mga sakop sa media sa Sugbo sa way pagpananghid sa bisan unsang ahensiya sa gobyerno ang Cebu Press Freedom Week sugod sa Septiyembre 21, anibersaryo sa martial law.
Sugod sa 2019, gideklarar ang Septiyembre 21 special working holiday sa Sugbo sa pagtimaan sa Cebu Press Freedom Day pinaagi sa Republic Act. No. 11122 nga napasar sa Nobyembre 30, 2018. Bisan sa Sugbo ra mapatuman, wa unta mahimong opisyal ang kalihokan kon wa pa aprobahi, sa buwag nga botasyon, sa mga kongresista ug mga senador.
***
Tungod sa pag-aprobar sa buwag nga botasyon sa House ug Senado sa 2018, napasar ang mosunod nga mga balaod:
RA 11041 nga niusab sa ngan sa Montevista-Cateel National Highway sa Compostela, Compostela Valley ngadto sa Benigno S. Aquino Jr. National Highway;
RA 11093 nga nagtukod sa Tambo National High School sa Parañaque City;
RA 11102 nga nagtukod sa SOCCSKSARGEN General Hospital sa Surallah, South Cotabato;
RA 11112 nga nagtukod sa Barangay Poblacion 2 sa Villanueva, Misamis Oriental; ug
RA 11146 nga nagdeklarar sa Hunyo 18 nga special nonworking holiday sa Bacolod City pagtimaan sa iyang cityhood.
***
Kay duha man ang atong bay balaoranan, way balaod nga mapasar kon di aprobahan sa buwag nga botasyon sa House ug Senado. Gituman kining maong panginahanglan sa pag-usab sa ngan sa eskuylahan, ospital, ug bisan kadalanan.
Sa pag-usab sa mga probisyon sa 1987 Constitution, nga makaapektar sa tibuok nasud ug tanang katawhan ug sa umaabot nga henerasyon, nganong mo-insistir man ang mga tigpasiugda sa People’s Initiative nga usahon na ang botasyon sa 316 ka kongresista ug 24 ka senador?