Sila ang unang namilok
Sa sinigaay og mata sa charter change (cha-cha), kinsa man ang unang namilok:
• Ang mga senador ba nga nisupak sa tanang nangagi nga mga pagsuway sa mga kongresista sa pag-usab sa 1987 Constitution pinaagi sa pagpasabot nga dunay mas importante ug mas dinalian nga mga problema ang nasud
nga angayng sulbaron; o
• Ang mga kongresista ba nga niinsistir nga ang labing laktod nga paagi sa cha-cha mao ang paghimong way kapuslanan sa Senado pinaagi sa hiniusa, di ang naandang buwag, nga botasyon sa 316 ka kongresista ug 24 ka senador.
Angayng basulon ang 14 ka senador sa ilang paglikoy. Kon tinuod ang pangangkon ni Senate President Migz Zubiri nga, human sa iyang pakigtagbo nila ni Presidente Ferdinand Marcos Jr. ug House Speaker Martin Romualdez parte sa cha-cha, mayoriya sa mga senador ang niuyon nga himuon ang constituent assembly (con-ass) sa pag-usab sa economic provisions sa Konstitusyon kay:
• Gitahasan sa presidente ang mga senador nga mangulo sa pagtuon sa mga probisyon nga kinahanglang usbon; ug
• Gipasaligan sila sa presidente nga di mahitabo nga laktawan ang Senado sa pag-usab sa Konstitusyon.
Kapasanginlan sab nga namilok si Romualdez nga niuyon dayon sa con-ass bisan gipasanginlan nga maoy nipabaha sa kuwarta pagpangolekta og pirma sa People’s
Initiative (PI). Gamay ra hinuon ang iyang pilok kay igo ra mang nidangop sa PI human giisnab sa Senado ang ilang mga resolusyon sa constitutional convention (Con-Con) ug con-ass.
Magpa-goryo-goryo hinuon nga di hunungon ang PI dihadiha dayon. Hangtod nga maseguro nga mosayaw na g’yud sa cha-cha ang mga senador.
Aron ba kaha pagtabon sa ilang pagbalitok, gilimitahan sa mga senador ang economic provisions nga usbon ngadto lang sa Public Services Act, edukasyon, ug advertising. Pero nahibawo tang tanan nga kon manglingkod nang mga senador ug mga kongresista isip con-ass, way makabuot nila unsay usbon. Wa nay makapugong kon:
• Lugwayan ang ilang mga termino
• Usbon ang sistema sa gobyerno aron ma-primero ministro ang di makadaog og nasudnong eleksiyon;
• Hingpit nang ibasura ang wa mapatuman nga ban sa politikanhong mga dinastiya; ug
• Pagpahuyang sa demokratikanhon nga mga institusyon aron pagseguro nga magpabilin ang mga Marcos sa gahom lapas sa 2028.