Gimingaw sa Malacañang
Nia ang mga postura sa mga Duterte sa pagpanghasi sa China sa West Philippine Sea: • Atol sa iyang administrasyon sa 2016-2022, nakigsuod si kanhi presidente Rodrigo Duterte ni Chinese President Xi Jinping;
• Usa ka tuig human nikanaog sa Malacañang, ang kanhi presidente nakigtagbo ni Xi sa Beijing ug nipasalig nga magpadayon ang ilang kasuod;
• Dayon nagpakahilom nang kanhi presidente ug iyang anak nga si Bise Presidente Sara Duterte Carpio; ug
• Karong bag-o nipasidaan na sila nga mosamot ang kaguliyang kon padayon nga mosukol si Presidente Ferdinand Marcos Jr. sa China.
Samtang nagpakahilom ang mga Duterte, gibisto sa opisyal sa Chinese Embassy sa Pilipinas nga nisaad ang kanhi presidente nga di na ayuhon ang BRP Sierra Madre ug pagkaon ug tubig na lang ang dad-on sa resupply mission para sa mga sundawo sa Ayungin Shoal.
Ang pasangil gipanghimakak nilang kanhi presidential legal counsel Salvador Panelo ug Senador Robin Padilla. Pero niangkon si kanhi presidential spokesman Harry Roque nga tinuod ang gentlemen’s agreement nilang Duterte ug Xi ug gani gipahibawo sa publiko ni kanhi Foreign secretary (karon Senador) Alan Peter Cayetano.
Si Roque ang unang nibandilyo sa bag-ong linya sa panghadlok sa mga Duterte: Kon di tumanon ni Marcos ang kauyonan nga gisudlan ni Duterte, mosamot ang kasuko sa China ug mas agresibong puwersa ang ilang gamiton.
Si retired Supreme Court senior associate justice Antonio Carpio ang nipasabot sa mga implikasyon sa binuang ni Duterte: Kon pasagdang madugta ang Sierra Madre, mapugos pagbiya ang atong kasundalohan, di makatukod ang Pilipinas og istruktura sa Ayungin ug gawasnon nang China nga mobanos pag-okupar ini.
Sa pag-insistir ni Duterte nga sakto siya (sa pagsipsip sa China) ug sayop si Marcos (sa pagsukol), gibanhaw ang karaan niyang hudlat: Way dag-anan ang Pilipinas kon gubaton og armas nukleyar sa China. May sulbad dayong gisaling-it ang lain niyang turutot nga si kanhi House speaker Pantaleon Alvarez: Resignasyon ni Marcos ug pagpuli ni Bise Presidente Sara (nga, nakalimot na tingali si Alvarez, maoy nagkudeta sa iyang speakership sa 2018).
Confidential funds, military pension, charter change, Mindanao secession, ug China: Bisan unsa na lay sakyan sa mga Duterte aron makabalik sa Malacañang.